భారతీయ సినీ యవనికపై చెరగని ముద్ర వేసిన విలక్షణ దర్శకుడు, ప్రయోగాత్మక చిత్రాల సృష్టికర్త లెజెండరీ ఫిలింమేకర్ సింగీతం శ్రీనివాసరావు అంత్యక్రియలు అశ్రునయనాల మధ్య ముగిశాయి. చెన్నైలోని నేసపాక్కం శ్మశానవాటికలో ఆదివారం సాయంత్రం కుటుంబ సభ్యులు, బంధుమిత్రులు, సినీ ప్రముఖుల సమక్షంలో అంతిమ సంస్కారాలు పూర్తయ్యాయి. వయోభారంతో పాటు అనారోగ్య సమస్యలతో చెన్నైలోని కావేరి ఆసుపత్రిలో చికిత్స పొందుతూ శనివారం సాయంత్రం 94 ఏళ్ల వయసులో ఆయన తుదిశ్వాస విడిచారు. ఆయన భౌతికకాయాన్ని విరుగంబాక్కంలోని నివాసానికి తరలించగా, అభిమానులు, ప్రముఖులు తరలివచ్చి కడసారి నివాళులర్పించారు.
సింగీతం శ్రీనివాసరావు దర్శకత్వంలో ‘పుష్పక విమానం’, ‘అపూర్వ సహోదరులు’, ‘మైఖేల్ మదన కామరాజు’ వంటి ఎన్నో చారిత్రక క్లాసిక్ చిత్రాల్లో నటించిన విశ్వనటుడు కమల్ హాసన్ స్వయంగా ఆయన నివాసానికి చేరుకుని తీవ్ర భావోద్వేగానికి గురయ్యారు. పార్థివ దేహాన్ని సందర్శించి నివాళులర్పించిన అనంతరం, సింగీతం కుటుంబ సభ్యులను ఓదార్చి తన ప్రగాఢ సానుభూతిని వ్యక్తం చేశారు. తన సినీ ప్రయాణంలో సింగీతం అందించిన ప్రోత్సాహం, మార్గదర్శకత్వాన్ని గుర్తుచేసుకుంటూ కమల్ హాసన్ కంటతడి పెట్టారు.
సింగీతం మరణవార్తతో యావత్ భారతీయ సినీ పరిశ్రమ తీవ్ర దిగ్భ్రాంతికి గురైంది. దర్శకుడు ఎస్.ఎస్. రాజమౌళి, మెగాస్టార్ చిరంజీవి, నందమూరి బాలకృష్ణ, జూనియర్ ఎన్టీఆర్, మహేశ్ బాబు వంటి అగ్ర తారలతో పాటు పలువురు సినీ రంగ ప్రముఖులు సోషల్ మీడియా వేదికగా ఘన నివాళులు అర్పించారు. మూకీ చిత్రాల నుంచి సైన్స్ ఫిక్షన్, జానపద, పౌరాణికాల వరకు అన్ని విభాగాల్లో వినూత్న ప్రయోగాలకు ఆద్యుడిగా నిలిచిన సింగీతం శ్రీనివాసరావు మృతి భారతీయ సినిమాకు తీరని లోటని కొనియాడారు.
