తెలంగాణలో యాదాద్రి అల్ట్రా మెగా థర్మల్ పవర్ ప్లాంట్ ప్రాజెక్టుపై కాంగ్రెస్, బీఆర్ఎస్ పార్టీల మధ్య రాజకీయ యుద్ధం తారాస్థాయికి చేరింది. యాదాద్రి ప్లాంట్‌ను చూపిస్తూ బీఆర్ఎస్ నాయకులు లేని గొప్పలు చెప్పుకుంటున్నారని రాష్ట్ర ఉప ముఖ్యమంత్రి, విద్యుత్ శాఖ మంత్రి మల్లు భట్టి విక్రమార్క తీవ్రస్థాయిలో ధ్వజమెత్తారు. అసలు ఈ భారీ ప్రాజెక్టు నిర్మాణానికి సంబంధించి శాస్త్రీయమైన డీపీఆర్ (సమగ్ర ప్రాజెక్టు నివేదిక) ఉందా అని ఆయన సూటిగా నిలదీశారు. గత పదేళ్ల బీఆర్ఎస్ పాలనలో విద్యుత్ రంగంలో జరిగిన భారీ లోపాలు, అక్రమాలు, తీసుకున్న తప్పుడు నిర్ణయాలను ఇకపై ప్రతి వారం ఆధారాలతో సహా ప్రజల ముందు పెడతామని ఆయన స్పష్టం చేశారు.
యాదాద్రి విద్యుత్ కేంద్రానికి సింగరేణి కాలరీస్ నుంచే నిరంతరం బొగ్గు సరఫరా చేస్తామంటూ గత ప్రభుత్వ పెద్దలు ప్రజలను మోసం చేశారని భట్టి విక్రమార్క ఆరోపించారు. యాదాద్రి ప్లాంట్ బాయిలర్ల డిజైన్‌కు అత్యంత కీలకమైన ‘జి-9’ (G9) గ్రేడ్ నాణ్యమైన బొగ్గు సింగరేణి గనుల్లో తగినంత అందుబాటులో లేదనే కనీస వాస్తవాన్ని కూడా గుర్తించకుండా ప్లాంట్‌ను నిర్మించారని ఎద్దేవా చేశారు. బొగ్గు లభ్యత, రవాణా ఖర్చులు, భవిష్యత్ అవసరాలపై ముందస్తు ప్రణాళికలు లేకుండా కేవలం కమిషన్ల కోసమే అనాలోచితంగా ప్రాజెక్టులు చేపట్టడం వల్ల నేడు విద్యుత్ సంస్థలు తీవ్ర ఆర్థిక, సాంకేతిక ఇబ్బందుల్లో కూరుకుపోయాయని విమర్శించారు.
గత ప్రభుత్వం సృష్టించిన అనేక ఆర్థిక సవాళ్లు ఉన్నప్పటికీ, ప్రస్తుత ప్రజా ప్రభుత్వం విద్యుత్ రంగంలో అత్యంత సమర్థవంతమైన నిర్వహణ చేపడుతోందని డిప్యూటీ సీఎం తెలిపారు. రాష్ట్ర చరిత్రలోనే రికార్డు స్థాయిలో విద్యుత్ డిమాండ్ ఏకంగా 20,000 మెగావాట్లకు చేరుకున్నప్పటికీ.. వినియోగదారులకు, రైతులకు, పరిశ్రమలకు ఎక్కడా ఒక్క నిమిషం కూడా కోతలు లేకుండా నాణ్యమైన కరెంట్‌ను సరఫరా చేస్తున్నామని ధీమా వ్యక్తం చేశారు. రాబోయే రోజుల్లో రాష్ట్రంలో పవర్ సప్లైని మరింత పటిష్టం చేస్తామని, బీఆర్ఎస్ అసత్య ప్రచారాలను ఎప్పటికప్పుడు ప్రజల సాక్షిగా తిప్పికొడతామని ఆయన పునరుద్ఘాటించారు.
