బిహార్ మాజీ ముఖ్యమంత్రులు లాలూ ప్రసాద్ యాదవ్, ఆయన సతీమణి రబ్రీదేవిలకు రాష్ట్ర ప్రభుత్వం జడ్ ప్లస్ కేటగిరీ భద్రతను ఇటీవల ఉపసంహరించుకుంది. దీని స్థానంలో ప్రత్యేక సాయుధ పోలీసులతో సాధారణ భద్రత కల్పించగా, ఈ చర్యను లాలూ కుటుంబం తీవ్రంగా వ్యతిరేకించింది. ప్రభుత్వం కల్పించిన నూతన భద్రత తమకు వద్దంటూ రబ్రీదేవి తన నివాసం నుంచి పోలీసులను వెనక్కి పంపించేశారు. ఈ నేపథ్యంలో పాట్నాలోని 10-సర్క్యులర్ రోడ్లో ఉన్న లాలూ నివాసం వద్దకు ఆర్జేడీ కార్యకర్తలు, స్థానిక నేతలు పెద్ద సంఖ్యలో చేరుకుని, చేతుల్లో కర్రలతో కాపలా కాస్తున్న దృశ్యాలు ప్రస్తుతం సోషల్ మీడియాలో విపరీతంగా వైరల్గా మారాయి.
ఈ పరిణామాలపై లాలూ చిన్న కుమారుడు, బిహార్ ప్రతిపక్ష నేత తేజస్వీ యాదవ్ తీవ్ర ఆగ్రహం వ్యక్తం చేశారు. ప్రభుత్వ కక్షసాధింపు చర్యలకు నిరసనగా తనకు కల్పించిన వై-ప్లస్ కేటగిరీ భద్రతను కూడా ఆయన అధికారులకు వెనక్కి పంపించివేశారు. అలాగే లాలూ పెద్ద కుమారుడు తేజ్ ప్రతాప్కు ఉన్న వై-ప్లస్ భద్రతను తొలగించి ప్రభుత్వం కేవలం ఒక కానిస్టేబుల్ను మాత్రమే కేటాయించింది. తమ కుటుంబానికి హాని తలపెట్టాలనే దురుద్దేశంతోనే ప్రభుత్వం ఈ నిర్ణయం తీసుకుందని లాలూ కుమార్తె రోహిణి ఆచార్య ఆరోపించారు. లాలూ యాదవ్ కుటుంబానికి తామే నిజమైన రక్షణ కవచమని చాటిచెప్పేందుకు మద్దతుదారులంతా తరలిరావాలని ఆమె పిలుపునిచ్చారు.
మరోవైపు, 1997 నుంచి 2005 వరకు బిహార్ ముఖ్యమంత్రిగా పనిచేసిన రబ్రీ దేవి ఉంటున్న పట్నా ప్రభుత్వ బంగ్లాను ఖాళీ చేయాలని అధికారులు కొద్ది రోజుల క్రితమే నోటీసులు జారీ చేశారు. ముఖ్యమంత్రి నివాసానికి సమీపంలో ఉన్న ఈ బంగ్లాను భవన నిర్మాణ శాఖ మంత్రి నంద్ కిషోర్ రామ్కు ప్రభుత్వం కేటాయించింది. అయితే ఈ నోటీసులపై రబ్రీ దేవి తీవ్రంగా స్పందిస్తూ ఇల్లు ఖాళీ చేయడానికి నిరాకరించారు. ప్రభుత్వం తనను బలవంతంగా ఖాళీ చేయించుకోవాలని, తాను మాత్రం ఇల్లు వదిలి వెళ్లేది లేదని ఆమె స్పష్టం చేశారు. ఈ భద్రత ఉపసంహరణ మరియు బంగ్లా వివాదం ప్రస్తుతం బిహార్ రాజకీయాల్లో తీవ్ర కలకలం రేపుతోంది.
