ఫిలిప్పీన్స్లో సంభవించిన భారీ భూకంపం ఆ దేశాన్ని తీవ్రంగా వణికించింది. ముఖ్యంగా మిండనావో దక్షిణ ద్వీపకల్పంలో సంభవించిన 7.8 తీవ్రత కలిగిన ఈ ఘోర విపత్తు కారణంగా మరణించిన వారి సంఖ్య మంగళవారం నాటికి 41కి చేరుకుంది. ఈ ప్రమాదంలో 450 మందికి పైగా తీవ్రంగా గాయపడ్డారని వైద్యులు వెల్లడించారు. భూకంపం ధాటికి అనేక భవనాలు కుప్పకూలడం, రహదారులు, వంతెనలు పూర్తిగా ధ్వంసం కావడంతో వేలాది మంది ప్రజలు నిరాశ్రయులై వీధుల్లోనే బిక్కుబిక్కుమంటూ కాలం వెళ్లదీస్తున్నారు.
తీవ్రమైన భూప్రకంపనల వల్ల ప్రధాన నగరాల్లోని ఆసుపత్రి భవనాలు కూడా దారుణంగా దెబ్బతిన్నాయి. జనరల్ శాంటోస్ నగర శివార్లలోని ఒక ప్రధాన ఆసుపత్రి భవనం లోపల ఉండటం సురక్షితం కాదని ఇంజినీర్లు తేల్చడంతో, రోగులందరినీ ఆరుబయట మైదానాల్లోకి తరలించారు. మండే ఎండలోనే తాత్కాలిక టెంట్లు వేసి వైద్యులు క్షతగాత్రులకు అత్యవసర చికిత్స అందిస్తున్నారు. గ్లాన్ మున్సిపాలిటీలో కొండచరియలు విరిగిపడి 13 మంది సజీవ సమాధి కాగా, అక్కడి ఆసుపత్రి దెబ్బతినడంతో 60 మందికి పైగా రోగులను రోడ్డుపైనే బెడ్లు వేసి ఉంచి చికిత్స అందిస్తున్న హృదయవిదారక దృశ్యాలు కనిపిస్తున్నాయి.
మరోవైపు, విపత్తు సంభవించిన ప్రాంతాల్లో రహదారులు, వంతెనలు తెగిపోవడంతో అనేక గ్రామాలకు బాహ్య ప్రపంచంతో సంబంధాలు పూర్తిగా తెగిపోయాయి. దీంతో రెస్క్యూ సిబ్బంది కేవలం హెలికాప్టర్ల ద్వారా మాత్రమే సహాయక చర్యలు చేపడుతున్నారు. శిథిలాల కింద చిక్కుకున్న వారిని వెలికితీసేందుకు రెస్క్యూ డాగ్స్తో శ్రమిస్తున్నప్పటికీ, నిరంతరం వస్తున్న భూప్రకంపనలు సహాయక చర్యలకు పెద్ద సవాలుగా మారాయని అధికారులు తెలిపారు. కాగా, భూకంపం సంభవించిన వెంటనే జారీ చేసిన సునామీ హెచ్చరికలను మధ్యాహ్నానికి ముప్పు తొలిగిపోవడంతో అధికారులు ఉపసంహరించుకున్నారు.
