తెలంగాణలో సంచలనం రేపిన కేంద్రమంత్రి బండి సంజయ్ కుమారుడు బండి భగీరథ్పై నమోదైన పోక్సో (POCSO) కేసుపై విలక్షణ నటుడు ప్రకాష్ రాజ్ ఘాటుగా స్పందించారు. ఈ వ్యవహారంలో నిందితుడిని అరెస్ట్ చేయడంలో రాష్ట్ర ప్రభుత్వం ఎందుకు జాప్యం చేస్తోందని ఆయన ముఖ్యమంత్రి రేవంత్ రెడ్డిని నిలదీశారు. ఈ మేరకు తన ‘ఎక్స్’ (ట్విట్టర్) ఖాతాలో ఒక పోస్ట్ చేస్తూ కాంగ్రెస్ ప్రభుత్వంపై విమర్శలు గుప్పించారు.
‘బేటా బచావ్’ ఏంటి రేవంత్ రెడ్డి గారు?
ప్రకాష్ రాజ్ తన ట్వీట్లో ప్రభుత్వంపై వ్యంగ్యాస్త్రాలు సంధిస్తూ.. “బండి ఎక్కి పారిపోయిన అమానుష బండిని ఎందుకు అరెస్ట్ చేయట్లేదు రేవంత్ రెడ్డి గారు? ‘బేటి బచావ్’ (ఆడపిల్లను కాపాడండి) వదిలేసి, ‘బేటా బచావ్’ (కొడుకును కాపాడండి) ఏంటి?” అని ప్రశ్నించారు. ఈ ట్వీట్కు తన ట్రేడ్ మార్క్ హ్యాష్ ట్యాగ్ #JustAsking ను కూడా జత చేశారు. సాధారణంగా కేంద్ర ప్రభుత్వంపై విమర్శలు చేసే ప్రకాష్ రాజ్, ఇప్పుడు నేరుగా రాష్ట్ర ప్రభుత్వాన్ని కూడా నిలదీయడం చర్చనీయాంశమైంది.
రాజకీయ దుమారం – సెలబ్రిటీల స్పందన
బండి భగీరథ్ కేసుపై ఇప్పటికే బీఆర్ఎస్ సహా ప్రతిపక్ష పార్టీలు తీవ్ర స్థాయిలో ఆందోళనలు చేస్తున్నాయి. బాధితురాలికి న్యాయం చేయడంలో ప్రభుత్వం నీరుగారుస్తోందని వారు ఆరోపిస్తున్నారు. ప్రకాష్ రాజ్తో పాటు యాంకర్ రష్మీ గౌతమ్, నటుడు మంచు మనోజ్ వంటి ఇతర సినీ ప్రముఖులు కూడా ఈ ఘటనపై పరోక్షంగా మరియు ప్రత్యక్షంగా స్పందిస్తూ బాధితురాలికి అండగా నిలవాలని సోషల్ మీడియా వేదికగా డిమాండ్ చేస్తున్నారు.
హైకోర్టును ఆశ్రయించిన నిందితుడు
మరోవైపు, తనపై నమోదైన పోక్సో కేసులో ఎలాంటి వాస్తవం లేదని, రాజకీయ కుట్రలో భాగంగానే తనను ఇరికించారని బండి భగీరథ్ తెలంగాణ హైకోర్టును ఆశ్రయించారు. ఈ కేసును కొట్టివేయాలని కోరుతూ ఆయన పిటిషన్ దాఖలు చేయడంతో రాష్ట్ర రాజకీయాల్లో ఈ అంశం మరింత వేడెక్కింది. బాధితురాలి కుటుంబానికి న్యాయం చేయడంలో రేవంత్ రెడ్డి ప్రభుత్వం ఏ విధంగా ముందుకు వెళ్తుందోనని సర్వత్రా ఉత్కంఠ నెలకొంది.
