తెలంగాణ రాజకీయాల్లో సంచలనం సృష్టిస్తున్న కేంద్ర మంత్రి బండి సంజయ్ కుమారుడు బండి భగీరథ్ పోక్సో (POCSO) కేసు ఇప్పుడు న్యాయస్థానానికి చేరింది. తనపై నమోదైన కేసును కొట్టివేయాలని (Quash), అలాగే తనకు మధ్యంతర బెయిల్ మంజూరు చేయాలని కోరుతూ భగీరథ్ మంగళవారం తెలంగాణ హైకోర్టులో పిటిషన్ దాఖలు చేశారు.
విచారణ వాయిదా – వెకేషన్ బెంచ్ నిర్ణయంపై ఉత్కంఠ
ప్రస్తుతం హైకోర్టుకు వేసవి సెలవులు ఉన్నందున, భగీరథ్ తరపు న్యాయవాదులు అత్యవసరంగా వెకేషన్ బెంచ్ను ఆశ్రయించారు. ఈ పిటిషన్ను స్వీకరించిన హైకోర్టు, దీనిపై విచారణను మే 14 (గురువారం) కు వాయిదా వేసింది. ఆ రోజున కోర్టు ఇచ్చే ఆదేశాల బట్టి భగీరథ్ అరెస్ట్ ఉంటుందా లేదా అనేది స్పష్టమవుతుంది. అప్పటి వరకు పోలీసుల తదుపరి చర్యలపై ఉత్కంఠ నెలకొంది.
కేసు నేపథ్యం ఏమిటి?
సైబరాబాద్ పరిధిలోని పేట్ బషీరాబాద్ పోలీస్ స్టేషన్లో మే 8న భగీరథ్పై కేసు నమోదైంది. 17 ఏళ్ల మైనర్ బాలిక తల్లి ఇచ్చిన ఫిర్యాదు ప్రకారం, గత ఏడాది డిసెంబర్లో మొయినాబాద్లోని ఒక ఫామ్హౌస్లో ఈ వేధింపులు జరిగినట్లు ఆరోపణలు ఉన్నాయి. అయితే, ఈ కేసు నమోదు కాకముందే.. సదరు బాలిక కుటుంబం తనను హనీట్రాప్ చేసి బ్లాక్ మెయిల్ చేస్తోందంటూ భగీరథ్ కరీంనగర్లో ఎదురు ఫిర్యాదు చేయడం గమనార్హం.
సిట్ (SIT) దర్యాప్తు ముమ్మరం
ముఖ్యమంత్రి రేవంత్ రెడ్డి ఆదేశాల మేరకు కూకట్పల్లి డీసీపీ రితిరాజ్ నేతృత్వంలో ప్రత్యేక దర్యాప్తు బృందం ఈ కేసును విచారిస్తోంది. నిందితుడు ప్రస్తుతం పరారీలో ఉన్నారని ప్రచారం జరుగుతున్న తరుణంలో, ఆయన హైకోర్టులో పిటిషన్ వేయడం ప్రాధాన్యత సంతరించుకుంది. పోక్సో చట్టంలోని నిబంధనలు అత్యంత కఠినంగా ఉండటంతో, న్యాయస్థానం భగీరథ్కు ఊరటనిస్తుందా లేక పోలీసుల విచారణకు మొగ్గు చూపుతుందా అనేది ఇప్పుడు రాష్ట్ర రాజకీయాల్లో హాట్ టాపిక్గా మారింది.
