కోలీవుడ్ స్టార్ హీరో సూర్య అభిమానులు ఎంతగానో ఎదురుచూస్తున్న యాక్షన్ ఎంటర్టైనర్ ‘కరుప్పు’ విడుదలకు ఊహించని అడ్డంకులు ఎదురయ్యాయి. మే 14న (గురువారం) ప్రపంచవ్యాప్తంగా గ్రాండ్గా రిలీజ్ కావాల్సిన ఈ సినిమా మార్నింగ్ షోలు రద్దు కావడంతో ఫ్యాన్స్ తీవ్ర నిరాశకు గురయ్యారు. కేవలం తమిళనాడులోనే కాకుండా అమెరికా వంటి ఓవర్సీస్ మార్కెట్లలో కూడా షోలు క్యాన్సిల్ అయ్యాయి. ఈ నేపథ్యంలో చిత్ర దర్శకుడు ఆర్జే బాలాజీ సోషల్ మీడియా వేదికగా ఒక ఎమోషనల్ వీడియోను విడుదల చేస్తూ, ఎదురవుతున్న ఇబ్బందులకు ప్రేక్షకులకు క్షమాపణలు చెప్పారు.
ఈ విడుదల జాప్యానికి ప్రధాన కారణం గత సినిమాలకు సంబంధించిన ఫైనాన్షియల్ ఇష్యూస్ అని కోలీవుడ్ వర్గాల సమాచారం. దాదాపు ₹50 కోట్ల వరకు బకాయిలు పెండింగ్లో ఉండటంతో ఫైనాన్షియర్లు క్లియరెన్స్ ఇవ్వలేదని తెలుస్తోంది. ప్రస్తుతం నిర్మాతలు ఈ సమస్యలను పరిష్కరించే పనిలో ఉన్నారని, సాయంత్రం 6 గంటల షో నాటికి సినిమా ఖచ్చితంగా థియేటర్లలోకి వస్తుందని ఆర్జే బాలాజీ ధీమా వ్యక్తం చేశారు. 32 నెలల సుదీర్ఘ నిరీక్షణ తర్వాత వస్తున్న ఈ సినిమాపై ఆయన పూర్తి నమ్మకంతో ఉన్నారు.
సూర్య సరసన త్రిష కథానాయికగా నటించిన ఈ చిత్రంపై భారీ అంచనాలు ఉన్నాయి. తమిళనాడు ముఖ్యమంత్రిగా దళపతి విజయ్ బాధ్యతలు స్వీకరించిన తర్వాత విడుదలవుతున్న మొదటి పెద్ద సినిమా ఇదే కావడం విశేషం. అంతేకాకుండా, ప్రభుత్వం ఉదయం 9 గంటల షోలకు ప్రత్యేక అనుమతి ఇచ్చినప్పటికీ, ఆర్థిక కారణాల వల్ల మొదటి షో పడకపోవడం గమనార్హం. ప్రస్తుతం చర్చలు తుది దశకు చేరుకున్నాయని, సాయంత్రం లోపు అన్ని అడ్డంకులు తొలిగి ‘కరుప్పు’ విజయవంతంగా విడుదలవుతుందని చిత్ర యూనిట్ ఆశిస్తోంది.
