ఆంధ్రప్రదేశ్ రాష్ట్ర ఆహార కమిషన్ (ఫుడ్ కమిషన్) ఛైర్మన్ చిట్టా విజయప్రతాప్ రెడ్డి భద్రత వ్యవహారంలో రాష్ట్ర ప్రభుత్వానికి ఏపీ హైకోర్టులో గట్టి చుక్కెదురైంది. ఆయనకు 1+1 భద్రతను వెంటనే పునరుద్ధరించాలని గతంలో సింగిల్ జడ్జి ఇచ్చిన ఉత్తర్వుల్లో జోక్యం చేసుకునేందుకు హైకోర్టు డివిజన్ బెంచ్ స్పష్టంగా నిరాకరించింది. ఈ విషయంలో రాష్ట్ర ప్రభుత్వం దాఖలు చేసిన అప్పీల్ పిటిషన్ను తోసిపుచ్చుతూ, ప్రస్తుత దశలో ఎలాంటి మధ్యంతర ఉత్తర్వులు లేదా స్టే జారీ చేయలేమని ధర్మాసనం తేల్చి చెప్పింది.
గతంలో ఫుడ్ కమిషన్ ఛైర్మన్గా ఉన్న విజయప్రతాప్ రెడ్డికి కల్పించిన భద్రతను కూటమి ప్రభుత్వం హఠాత్తుగా ఉపసంహరించుకుంది. ప్రభుత్వ తీసుకున్న ఈ నిర్ణయాన్ని సవాల్ చేస్తూ ఆయన హైకోర్టును ఆశ్రయించగా, అప్పట్లో విచారణ జరిపిన సింగిల్ జడ్జి ఆయనకు 1+1 భద్రతను తక్షణమే పునరుద్ధరించాలని ప్రభుత్వాన్ని ఆదేశించారు. అయితే, సింగిల్ జడ్జి ఇచ్చిన ఈ తీర్పును సవాల్ చేస్తూ రాష్ట్ర ప్రభుత్వం హైకోర్టు డివిజన్ బెంచ్లో మళ్లీ అప్పీల్ దాఖలు చేసింది.
ఈ పిటిషన్పై విచారణ జరిపిన డివిజన్ బెంచ్ ధర్మాసనం.. ఈ అంశంలో మరింత లోతైన పరిశీలన అవసరమని అభిప్రాయపడింది. అందువల్ల సింగిల్ జడ్జి ఇచ్చిన ఉత్తర్వులపై స్టే ఇచ్చేందుకు న్యాయస్థానం అంగీకరించకపోవడంతో, విజయప్రతాప్ రెడ్డికి ప్రస్తుతం 1+1 భద్రత యథావిధిగా కొనసాగనుంది. అనంతరం ఈ కేసు తదుపరి విచారణను హైకోర్టు ధర్మాసనం మూడు నెలల పాటు వాయిదా వేసింది.
