వైఎస్సార్‌సీపీ సీనియర్ నేత, మాజీ మంత్రి జోగి రమేశ్ కుటుంబ వివాదం మరోసారి తీవ్ర దుమారం రేపుతోంది. జోగి రమేశ్ కోడలు మేఘన, ఆమె తండ్రి కృష్ణ ప్రయాణిస్తున్న కారును ప్రైవేట్ ట్రావెల్స్ బస్సు ఢీకొట్టిన ఘటనపై ఆమె తండ్రి పోలీసులను ఆశ్రయించారు. విజయవాడ నుంచి తెలంగాణలోని కోదాడకు వెళ్తుండగా వెనుక నుంచి వేగంగా వచ్చిన బస్సు కారును ఢీకొట్టిందని, ఇది సాధారణ రోడ్డు ప్రమాదం కాదని.. తమను అంతమొందించేందుకు మాజీ మంత్రి జోగి రమేశ్ చేసిన కుట్ర కావచ్చని అనుమానం వ్యక్తం చేస్తూ ఇబ్రహీంపట్నం పోలీస్ స్టేషన్‌లో లిఖితపూర్వకంగా ఫిర్యాదు చేశారు.
గతంలో జోగి రమేశ్ కుటుంబంపై నమోదైన వరకట్న వేధింపుల కేసు నేపథ్యంలోనే ఈ ప్రమాదం జరిగిందని మేఘన కుటుంబ సభ్యులు ఆరోపిస్తున్నారు. వివాహ సమయంలో రూ. 5 కోట్లు ఖర్చు చేసినప్పటికీ, అదనపు కట్నం కోసం తనను తీవ్రంగా వేధించారంటూ భర్త జోగి రాజీవ్, మామ జోగి రమేశ్ సహా 11 మందిపై మేఘన గతంలోనే గృహహింస, హత్యాయత్నం కేసులు పెట్టిన సంగతి తెలిసిందే. తాజాగా జరిగిన రోడ్డు ప్రమాదం కూడా పక్కా ప్లాన్ ప్రకారమే జరిగిందని, తమకు ప్రాణహాని ఉందని తండ్రి కృష్ణ పేర్కొనడంతో ఈ వ్యవహారం రాజకీయ వర్గాల్లో తీవ్ర చర్చనీయాంశంగా మారింది.
బాధితుల ఫిర్యాదు స్వీకరించిన ఇబ్రహీంపట్నం పోలీసులు కేసు నమోదు చేసి సమగ్ర దర్యాప్తు ప్రారంభించారు. అయితే ప్రాథమిక విచారణ ప్రకారం ఇది సాధారణంగా జరిగిన రోడ్డు ప్రమాదమేనని, ఉద్దేశపూర్వకంగా దాడి చేసినట్లు ఎలాంటి ఆధారాలు లభించలేదని పోలీసు వర్గాలు వెల్లడించాయి. మరోవైపు తమపై వస్తున్న ఈ ఆరోపణలన్నింటినీ జోగి రమేశ్ కుటుంబం మొదటి నుంచీ తీవ్రంగా ఖండిస్తూ వస్తోంది. ఇదంతా తమ ప్రతిష్టను దిగజార్చేందుకు ప్రత్యర్థులు చేస్తున్న రాజకీయ కుట్ర అని స్పష్టం చేస్తున్నారు.
