హర్మూజ్ జలసంధిలో అమెరికా వైఫల్యంతో ఒక సరికొత్త అధ్యాయం ప్రారంభమైందని ఇరాన్ సుప్రీం లీడర్ మొజ్తబా ఖమేనీ సంచలన వ్యాఖ్యలు చేశారు. అమెరికా, ఇజ్రాయెల్లతో ఇరాన్ యుద్ధం ప్రారంభమైనప్పటి నుంచి పర్షియన్ గల్ఫ్ ప్రాంతంలో సమీకరణాలు వేగంగా మారుతున్నాయని ఆయన పేర్కొన్నారు. ఈ మేరకు విడుదల చేసిన ఒక లిఖితపూర్వక ప్రకటనలో, పర్షియన్ గల్ఫ్లో అమెరికన్లకు స్థానం కేవలం సముద్ర జలాల అడుగున మాత్రమే ఉంటుందని ఎద్దేవా చేశారు.
అమెరికా ఎన్ని దిగ్బంధనాలు సృష్టించినప్పటికీ, ఇరాన్ తన అణు మరియు క్షిపణి సామర్థ్యాలను పటిష్టంగా పరిరక్షించుకుంటుందని మొజ్తబా ఖమేనీ స్పష్టం చేశారు. హర్మూజ్ జలసంధి వద్ద త్వరలోనే కొత్త నియమ నిబంధనలను అమలు చేయబోతున్నట్లు తెలుస్తోంది. ఈ నేపథ్యంలో సుప్రీం లీడర్ చేసిన వ్యాఖ్యలు అంతర్జాతీయంగా ప్రాధాన్యత సంతరించుకున్నాయి. ఇరాన్ తన సార్వభౌమాధికారాన్ని కాపాడుకోవడంలో వెనకడుగు వేయబోదని ఆయన సందేశం ఇచ్చారు.
అంతకుముందు ఇరాన్ అధ్యక్షుడు మసూద్ పెజెష్కియాన్ కూడా అమెరికా తీరును తప్పుబట్టారు. ఇరాన్ ఓడరేవులపై అమెరికా విధిస్తున్న ఆంక్షలు మరియు దిగ్బంధనాలు అంతర్జాతీయ చట్టాలకు విరుద్ధమని ఆయన మండిపడ్డారు. ఇటువంటి చర్యల వల్ల గల్ఫ్ ప్రాంతంలో చమురు సరఫరాకు తీవ్ర అంతరాయం కలుగుతుందని, దీనికి అమెరికాయే బాధ్యత వహించాల్సి ఉంటుందని హెచ్చరించారు. సముద్ర మార్గాలను అడ్డుకోవడం ద్వారా అమెరికా తన లక్ష్యాలను సాధించలేదని ఆయన స్పష్టం చేశారు.
