చిన్న వ్యాపారాలు చేసుకునే వీధి వ్యాపారులకు ఆర్థికంగా అండగా నిలిచేందుకు కేంద్ర ప్రభుత్వం ‘పీఎం స్వనిధి’ (PM SVANidhi) పథకాన్ని అమలు చేస్తోంది. టీ స్టాళ్లు, టిఫిన్ సెంటర్లు, పండ్ల బండ్లు, ఫుట్పాత్ దుకాణాలు నడుపుకునే చిన్న తరహా వ్యాపారులకు ఈ పథకం ఒక గొప్ప వరం. ఎలాంటి ఆస్తి పత్రాలు లేదా గ్యారెంటీ (హామీ) లేకుండానే ఆధార్ కార్డు ఆధారంగా ఈ పథకం కింద రూ.15,000 నుండి గరిష్టంగా రూ.90,000 వరకు వర్కింగ్ క్యాపిటల్ రుణాన్ని సులభంగా పొందవచ్చు. ఈ రుణాల మంజూరు గడువును మార్చి 31, 2030 వరకు పొడిగించారు.
ఈ పథకం మొత్తం మూడు దశల్లో లబ్ధిదారులకు రుణ సహాయాన్ని అందిస్తుంది. మొదటి విడతగా రూ.15,000 లోన్ ఇస్తారు, దీనిని 12 నెలల్లో సకాలంలో చెల్లిస్తే రెండో విడతలో రూ.25,000 (18 నెలల గడువు) రుణం లభిస్తుంది. ఆ తర్వాత మూడో విడతగా రూ.50,000 రుణాన్ని 36 నెలల కాలపరిమితితో అందిస్తారు. ఇలా క్రమశిక్షణతో లోన్ రీపేమెంట్ చేసే వ్యాపారులకు ప్రభుత్వం వడ్డీపై 7% సబ్సిడీని నేరుగా వారి బ్యాంక్ ఖాతాల్లో జమ చేయడమే కాకుండా, తదుపరి దశల్లో ఎక్కువ రుణాన్ని పొందేందుకు అవకాశం కల్పిస్తుంది.
పీఎం స్వనిధి పథకానికి దరఖాస్తు చేసుకోవడం చాలా సులభం. 18 ఏళ్లు నిండిన భారతీయ పౌరులై ఉండి, పట్టణ లేదా సెమీ అర్బన్ ప్రాంతాల్లో వీధి వ్యాపారం చేసుకునే వారు దీనికి అర్హులు. ఆధార్ కార్డు, బ్యాంక్ పాస్బుక్, మున్సిపాలిటీ లేదా టౌన్ వెండింగ్ కమిటీ ఇచ్చిన గుర్తింపు పత్రం (వెండింగ్ సర్టిఫికెట్) ఉంటే సరిపోతుంది. అధికారిక వెబ్సైట్ (https://pmsvanidhi.mohua.gov.in/) ద్వారా ఆన్లైన్లో మొబైల్ ఓటీపీ (OTP) వెరిఫికేషన్ పూర్తి చేసి, అవసరమైన వివరాలు సమర్పించి ఈ రుణాల కోసం దరఖాస్తు చేసుకోవచ్చు.
