ఆంధ్రప్రదేశ్ రాష్ట్రాన్ని డంపింగ్ యార్డులు లేని క్లీన్ స్టేట్గా తీర్చిదిద్దడమే కూటమి ప్రభుత్వ లక్ష్యమని ఏపీ డిప్యూటీ సీఎం పవన్ కళ్యాణ్ స్పష్టం చేశారు. పల్నాడు జిల్లా కొండవీడులోని ‘జిందాల్ వేస్ట్ టూ ఎనర్జీ’ ప్లాంటును శనివారం ఆయన సందర్శించారు. ఈ సందర్భంగా చెత్త నుంచి విద్యుత్ తయారు చేసే విధానాన్ని, బూడిదతో ఇటుకలు తయారు చేసే ప్రక్రియను అధికారులను అడిగి తెలుసుకున్నారు. అనంతరం పవన్ కళ్యాణ్ మాట్లాడుతూ.. రాష్ట్రంలో రోజువారీగా ఉత్పత్తి అవుతోన్న 7,200 టన్నుల పొడి చెత్తను సమర్థవంతంగా నిర్వహించడానికి ఇటువంటి వేస్ట్ టూ ఎనర్జీ ప్లాంట్లు మరిన్ని అవసరమని పేర్కొన్నారు. ప్రతి 100 కిలోమీటర్లకు ఒక ప్లాంటు చొప్పున రాష్ట్రవ్యాప్తంగా త్వరలోనే మరో 6 నూతన ప్లాంట్లను ఏర్పాటు చేయడానికి ప్రభుత్వం సుముఖంగా ఉందనే కీలక విషయాన్ని వెల్లడించారు.
వ్యర్థాల నిర్వహణ మరియు విద్యుత్ ఉత్పాదనలో సింగపూర్ దేశం ప్రపంచానికే ఆదర్శంగా నిలుస్తోందని పవన్ కళ్యాణ్ ఈ సందర్భంగా కొనియాడారు. సింగపూర్ ప్రజలు ఉపయోగించే విద్యుత్తులో దాదాపు 2.8 శాతం కేవలం చెత్త ద్వారా ఉత్పత్తి అయ్యేదేనని గుర్తుచేసిన ఆయన.. అక్కడ ‘టాంజాంగ్ టెర్మినల్’లో చెత్తను వేరు చేసే ప్రక్రియ అత్యంత క్రమశిక్షణతో, శాస్త్రీయంగా జరుగుతుందన్నారు. అదే తరహా ఆధునిక సాంకేతిక విధానాన్ని మన విశాఖపట్నం పోర్టులో కూడా ప్రయోగాత్మకంగా అమలు చేసేందుకు కొత్తగా ఆలోచిస్తున్నట్లు డిప్యూటీ సీఎం ప్రకటించారు. ప్రస్తుతం కొండవీడు జిందాల్ ప్లాంట్ ద్వారా 20 మెగావాట్లు, విశాఖ ప్లాంట్ ద్వారా 15 మెగావాట్ల విద్యుత్ ఉత్పత్తి అవుతోందని.. కాకినాడలో ఇప్పటికే కొత్త ప్లాంట్ పనులు ప్రారంభమవ్వగా, నెల్లూరు, కడప, కర్నూలు, విజయవాడ, తిరుపతి ప్రాంతాల్లో కూడా త్వరలోనే వీటిని విస్తరిస్తామని స్పష్టం చేశారు.
మరోవైపు, రాబోయే గోదావరి పుష్కరాలను పూర్తిస్థాయిలో ‘కాలుష్యరహిత పుష్కరాలు’గా నిర్వహించాలనే పట్టుదలతో ప్రభుత్వం ఉందని పవన్ కళ్యాణ్ తెలిపారు. నదిలో కలిసే వ్యర్థాలను శాశ్వతంగా అరికట్టేందుకు కట్టుదిట్టమైన ప్రణాళికలు సిద్ధం చేస్తున్నామన్నారు. పుష్కరాలతో ప్రత్యక్ష సంబంధం ఉన్న 268 గ్రామ పంచాయతీల అధికారులకు నదీ సంరక్షణ, పారిశుద్ధ్య నిర్వహణపై ప్రత్యేక వర్క్షాపులు నిర్వహించి శిక్షణ ఇవ్వనున్నట్లు చెప్పారు. గ్రామాల్లో చెత్త సేకరణ ద్వారా పంచాయతీలు అదనపు ఆదాయాన్ని ఎలా సంపాదించవచ్చో క్లస్టర్ల వారీగా అవగాహన కల్పిస్తామన్నారు. ప్రజలు కూడా ఇళ్లవద్దే తడి, పొడి చెత్తను వేరు చేసే అలవాటును పెంపొందించుకోవాలని, అందరి భాగస్వామ్యంతోనే ఏపీని సుందరంగా తీర్చిదిద్దగలమని డిప్యూటీ సీఎం పిలుపునిచ్చారు.
