ట్రాఫిక్ నిబంధనల ఉల్లంఘనలు, ఈ-చలానాల జరిమానాల నుంచి తప్పించుకోవడానికి వాహనాల నంబర్ ప్లేట్లను మార్చే కేటుగాళ్లపై హైదరాబాద్ పోలీసులు ఉక్కుపాదం మోపుతున్నారు. నకిలీ నంబర్ ప్లేట్లతో రోడ్లపై తిరుగుతున్న వాహనదారులపై కఠిన చర్యలు ఉంటాయని ట్రాఫిక్ పోలీసులు తీవ్ర హెచ్చరికలు జారీ చేశారు. నగరంలో గత వారం రోజులుగా నిర్వహించిన ప్రత్యేక తనిఖీల్లో భాగంగా ఫేక్ ప్లేట్లు వాడుతున్న ఆరుగురిపై పోలీసులు క్రిమినల్ కేసులు నమోదు చేసి, వారి వాహనాలను స్వాధీనం చేసుకున్నారు.
పోలీసుల నిఘా కెమెరాలు, ఈ-చలానాల నుంచి తప్పించుకునేందుకు కొందరు వాహనదారులు నంబర్లను ట్యాంపరింగ్ చేయడం లేదా వేరే వాహనాల నంబర్లను వాడుకోవడం లాంటి తీవ్రమైన నేరాలకు పాల్పడుతున్నట్లు తనిఖీల్లో తేలింది. సుల్తాన్బజార్, మెహదీపట్నం, బహదూర్పురాలతో పాటు మేడిపల్లి, పెద్దపల్లి, కట్టంగూర్ పరిధిలో ఈ కేసులు నమోదయ్యాయి. ఇకపై ఇలాంటి అక్రమాలకు పాల్పడితే కేవలం జరిమానాతో వదిలిపెట్టకుండా, కఠినమైన సెక్షన్ల కింద కేసులు నమోదు చేసి రిమాండ్కు తరలిస్తామని పోలీసులు స్పష్టం చేశారు.
వాహనదారులందరూ ప్రభుత్వం అధికారికంగా ఆమోదించిన ‘హై సెక్యూరిటీ రిజిస్ట్రేషన్ ప్లేట్లు’ (HSRP) మాత్రమే వాడాలని ట్రాఫిక్ విభాగం సూచించింది. నంబర్ ప్లేట్లపై ఎలాంటి ఫ్యాన్సీ ఫాంట్లు, స్టిక్కర్లు, దేవుళ్ల బొమ్మలు ఉండకూడదని, అంకెలు స్పష్టంగా కనిపించకుండా చేసే ఏ ప్రయత్నమైనా చట్టరీత్యా నేరమని హెచ్చరించారు. నగరంలో శాంతిభద్రతల పరిరక్షణ, నేరాల నియంత్రణ కోసం ఈ ప్రత్యేక తనిఖీలను మరింత తీవ్రతరం చేయనున్నట్లు అధికారులు వెల్లడించారు.
