యాదాద్రి భువనగిరి జిల్లా బీబీనగర్ రైల్వే స్టేషన్ సమీపంలో బుధవారం సాయంత్రం తీవ్ర కలకలం రేగింది. ప్రయాణికులతో వెళ్తున్న సిర్పూర్-కాగజ్‌నగర్ ఎక్స్‌ప్రెస్ రైలు చక్రాల భాగం నుంచి ఒక్కసారిగా భారీగా పొగలు, మంటలు చెలరేగాయి. బోగీల కింద నుంచి దట్టమైన పొగలు వ్యాపించడంతో రైలులోని ప్రయాణికులు తీవ్ర భయాందోళనలకు గురై కేకలు వేశారు. అయితే రైలు కో-పైలట్ అప్రమత్తమై వెంటనే ప్రమాదాన్ని పసిగట్టడంతో పెను విషాదం తప్పింది.
రైలు చక్రాల కింది నుంచి పొగలు వస్తుండటాన్ని గమనించిన కో-పైలట్ ఏమాత్రం ఆలస్యం చేయకుండా ప్రధాన లోకో పైలట్‌ను అప్రమత్తం చేశారు. దీంతో ఆయన అత్యవసర బ్రేకులు వేసి రైలును పట్టాలపైనే సురక్షితంగా నిలిపివేశారు. రైలు ఆగీఆగగానే బోగీల్లోని ప్రయాణికులంతా ప్రాణభయంతో లగేజీలను వదిలేసి హుటాహుటిన కిందకు దూకి పరుగులు తీశారు. రైల్వే సిబ్బంది వెంటనే స్టేషన్ అధికారులకు, అగ్నిమాపక విభాగానికి సమాచారం అందించడంతో సహాయక చర్యలు వేగవంతమయ్యాయి.
ఘటనా స్థలానికి చేరుకున్న ఫైర్ సిబ్బంది, రైల్వే టెక్నికల్ సిబ్బంది మంటలను పూర్తిగా అదుపులోకి తీసుకొచ్చారు. రైలు చక్రాలకు ఉండే బ్రేక్ లైనర్ల మధ్య తీవ్రస్థాయిలో ఘర్షణ (ఫ్రిక్షన్) ఏర్పడటం వల్లే వేడి పుట్టి పొగలు, స్వల్ప మంటలు చెలరేగినట్లు రైల్వే అధికారుల ప్రాథమిక విచారణలో తేలింది. లోకో పైలట్ల సమయస్ఫూర్తి కారణంగా ఎవరికీ ఎలాంటి గాయాలు కాకపోవడంతో పాటు భారీ ఆస్తి నష్టం తప్పడంతో ప్రయాణికులు, దక్షిణ మధ్య రైల్వే అధికారులు పెద్ద ఊపిరి పీల్చుకున్నారు.
