ఆంధ్రప్రదేశ్లో కొనసాగుతున్న డీజిల్ కొరత సామాన్య ప్రయాణికులను తీవ్ర ఇబ్బందులకు గురిచేస్తోంది. తాజాగా హైదరాబాద్ నుంచి పాలకొల్లు వెళ్తున్న ‘వర్మ ప్రైవేటు ట్రావెల్స్’ బస్సులో డీజిల్ అయిపోవడంతో విజయవాడ సమీపంలోని ఇబ్రహీంపట్నం వద్ద నిలిచిపోయింది. కనీసం ప్రత్యామ్నాయ ఏర్పాట్లు చేయాల్సిన బాధ్యతను మరిచి, డ్రైవర్ ప్రయాణికులను గాలికి వదిలేసి అక్కడి నుంచి పారిపోవడం తీవ్ర కలకలం రేపింది. అర్థరాత్రి వేళ చిన్నపిల్లలు, వృద్ధులతో సహా ప్రయాణికులు రోడ్డుపైనే పడిగాపులు కాయాల్సి వచ్చింది.
రాష్ట్రవ్యాప్తంగా గత రెండు రోజులుగా పెట్రోల్, డీజిల్ డిమాండ్ అకస్మాత్తుగా పెరగడంతో ఈ సంక్షోభం తలెత్తింది. సాధారణం కంటే పెట్రోల్ వినియోగం 34 శాతం, డీజిల్ వినియోగం 16 శాతం పెరగడం, అలాగే రిలయన్స్ మరియు నయారా వంటి ప్రైవేట్ సంస్థలు సరఫరా నిలిపివేయడం ఈ పరిస్థితికి ప్రధాన కారణాలని అధికారులు గుర్తించారు. దీనివల్ల రాష్ట్రంలోని మెజారిటీ బంకుల వద్ద ‘నో స్టాక్’ బోర్డులు దర్శనమిస్తుండగా, మిగిలిన చోట్ల వాహనదారులు కిలోమీటర్ల మేర క్యూ కడుతున్నారు.
ఈ పరిస్థితిపై ముఖ్యమంత్రి నారా చంద్రబాబు నాయుడు సీరియస్ అయ్యారు. ఆదివారం రాత్రి ఆయిల్ కంపెనీ ప్రతినిధులు మరియు కలెక్టర్లతో అత్యవసర టెలీకాన్ఫరెన్స్ నిర్వహించి, ఎక్కడా ఇంధన కొరత ఉండకూడదని ఆదేశించారు. ప్రతి జిల్లాలో నిఘా ఉంచేందుకు ప్రత్యేక టాస్క్ ఫోర్స్ బృందాలను ఏర్పాటు చేశారు. సోమవారం నుంచి సరఫరా మెరుగుపడుతుందని ప్రభుత్వం హామీ ఇచ్చినప్పటికీ, క్షేత్రస్థాయిలో ఇంకా అనేక ఇబ్బందులు ఎదురవుతూనే ఉన్నాయి.
