ఆంధ్రప్రదేశ్లో ఇటీవల నిర్వహించిన డీఎస్సీ నియామక ప్రక్రియపై వస్తున్న ఆరోపణలు, అపోహలపై రాష్ట్ర ప్రభుత్వం పూర్తిస్థాయిలో స్పష్టతనిచ్చింది. ఈ మొత్తం ఉపాధ్యాయ నియామక ప్రక్రియ అత్యంత పారదర్శకంగా, పటిష్టమైన భద్రతా ప్రమాణాలతో జరిగిందని, ఇందులో ఎలాంటి అవకతవకలకు తావులేదని విద్యాశాఖ కార్యదర్శి కోన శశిధర్ స్పష్టం చేశారు. శనివారం ఆయన మీడియాతో మాట్లాడుతూ.. పరీక్షల నిర్వహణ పూర్తి డిజిటల్ విధానంలో జరిగిందని గుర్తుచేశారు. దేశంలోనే అత్యంత విశ్వసనీయమైన ‘టీసీఎస్ ఐయాన్’ (TCS iON) ప్లాట్ఫామ్ ద్వారా కంప్యూటర్ ఆధారిత విధానంలో (CBT) పరీక్షలు జరిగాయని, 256-బిట్ ఎన్క్రిప్షన్ పద్ధతిలో ప్రశ్నపత్రాలు నేరుగా కేంద్రాలకు వెళ్లడం వల్ల మానవ ప్రమేయానికి గానీ, మ్యానిపులేట్ చేయడానికి గానీ ఎక్కడా వీలుపడలేదని ఆయన వివరించారు.
రాష్ట్రవ్యాప్తంగా 13 జిల్లాలతో పాటు పొరుగు రాష్ట్రాల్లోని ప్రధాన నగరాల్లో కలిపి మొత్తం 154 కేంద్రాల్లో ఈ పరీక్షలు కట్టుదిట్టంగా జరిగాయని శశిధర్ తెలిపారు. సుమారు 24 రోజుల పాటు 89 సెషన్లలో జరిగిన ఈ పరీక్షల్లో ప్రతి కేంద్రంలోనూ సీసీ కెమెరాల నిరంతర పర్యవేక్షణతో పాటు ప్రభుత్వ, టీసీఎస్ ప్రతినిధులతో కట్టుదిట్టమైన నిఘా ఏర్పాటు చేశామన్నారు. ఫలితాల ప్రకటనలో విమర్శలను కొట్టిపారేస్తూ.. వేర్వేరు సెషన్లలో పరీక్షలు జరిగినందున శాస్త్రీయమైన నార్మలైజేషన్ విధానంలో స్కోర్లను లెక్కించామని చెప్పారు. డీఎస్సీ మరియు టెట్-డీఎస్సీ కలిపిన స్కోర్ల జాబితాలను జిల్లాల వారీగా వెబ్సైట్లో ప్రచురించామని, ఆ అధికారిక జాబితాలను వెబ్సైట్ నుండి తొలగించారనే ప్రచారంలో ఏమాత్రం వాస్తవం లేదని, అవి ఇప్పటికీ అందుబాటులోనే ఉన్నాయని స్పష్టం చేశారు.
ఇక అభ్యర్థుల దరఖాస్తుల స్వీకరణ నుండి సర్టిఫికెట్ల వెరిఫికేషన్ వరకు ప్రతి దశనూ నిరుద్యోగులకు అనుకూలంగా మార్చామని విద్యాశాఖ కార్యదర్శి తెలిపారు. ప్రారంభంలో దరఖాస్తు సమయంలోనే అన్ని ధృవపత్రాలు అప్లోడ్ చేయాలనే నిబంధన ఉన్నప్పటికీ, అభ్యర్థుల విజ్ఞప్తి మేరకు వెరిఫికేషన్ సమయంలో సమర్పించేలా వెసులుబాటు కల్పించామని గుర్తుచేశారు. సందేహాల నివృత్తి కోసం ప్రతి జిల్లాలో ప్రత్యేక హెల్ప్డెస్క్లు కూడా విజయవంతంగా పనిచేశాయన్నారు. మొత్తం మీద రాష్ట్రంలో ఖాళీగా ఉన్న 16,347 పోస్టుల భర్తీకి సంబంధించిన ఈ మెగా డీఎస్సీ ప్రక్రియను నిబంధనలకు లోబడి, నిరుద్యోగ యువతకు ఎటువంటి ఇబ్బంది లేకుండా విజయవంతంగా పూర్తి చేశామని కోన శశిధర్ పునరుద్ఘాటించారు.
