వ్యూహాత్మక తప్పిదాలే కొంపముంచాయి..
ఐపీఎల్ 2026లో వరుస విజయాలతో దూసుకుపోతున్న రాజస్థాన్ రాయల్స్ (RR) జోరుకు కోల్కతా నైట్ రైడర్స్ (KKR) బ్రేక్ వేసింది. అయితే, ఈ ఓటమికి ఆటగాళ్ల వైఫల్యం కంటే కూడా కెప్టెన్ రియాన్ పరాగ్ తీసుకున్న వ్యూహాత్మక నిర్ణయాలే కారణమని సీనియర్ ఆఫ్ స్పిన్నర్ రవిచంద్రన్ అశ్విన్ విమర్శించారు. తన యూట్యూబ్ ఛానెల్ వేదికగా మ్యాచ్ను విశ్లేషించిన అశ్విన్, పరాగ్ కెప్టెన్సీలోని లోపాలను ఎత్తిచూపారు. డెత్ ఓవర్లలో సరైన బౌలర్లను ఉపయోగించుకోకపోవడమే మ్యాచ్ చేజారడానికి ప్రధాన కారణమని ఆయన అభిప్రాయపడ్డారు.
జడేజాను పక్కన పెట్టడంపై ఆగ్రహం..
ఈ మ్యాచ్లో రాజస్థాన్ తరపున రవీంద్ర జడేజా అద్భుతమైన ఫామ్లో ఉన్నాడు. 3 ఓవర్లు వేసి కేవలం 8 పరుగులు మాత్రమే ఇచ్చి 2 కీలక వికెట్లు తీసిన జడేజాకు, నిర్ణయాత్మకమైన డెత్ ఓవర్లలో బంతిని ఇవ్వకపోవడాన్ని అశ్విన్ తప్పుబట్టారు. “నీ దగ్గర వరల్డ్ క్లాస్ స్పిన్నర్ ఉన్నప్పుడు, అతడిని కాదని అనుభవం లేని బౌలర్లకు 18, 20 ఓవర్లు ఇవ్వడం ఏంటి?” అని నిలదీశారు. డేటా ప్రకారం లెఫ్ట్ హ్యాండ్ బ్యాటర్లకు లెఫ్ట్ ఆర్మ్ స్పిన్నర్లు బౌలింగ్ చేయకూడదనే మొండి సూత్రాన్ని పట్టుకుని కూర్చుంటే విజయాలు రావని అశ్విన్ ఘాటుగా వ్యాఖ్యానించారు.
సీనియర్ల మనోధైర్యం దెబ్బతినే ప్రమాదం..
కెప్టెన్ అనేవాడు సీనియర్ బౌలర్లపై నమ్మకం ఉంచాలని, అప్పుడే జట్టు బలోపేతం అవుతుందని అశ్విన్ సూచించారు. జడేజా వంటి అత్యుత్తమ బౌలర్ను కీలక సమయంలో పక్కన పెట్టడం వల్ల అతడి మనోధైర్యం దెబ్బతినే అవకాశం ఉందని హెచ్చరించారు. “నీ బెస్ట్ బౌలర్లతో బౌలింగ్ చేయించి ఓడిపోతే తప్పులేదు కానీ, ప్రయోగాలు చేసి మ్యాచ్ పోగొట్టుకోవడం సరికాదు” అని అశ్విన్ స్పష్టం చేశారు. ప్రస్తుతం పాయింట్ల పట్టికలో 3వ స్థానంలో ఉన్న రాజస్థాన్, ఇలాంటి కెప్టెన్సీ లోపాలను సరిదిద్దుకోకపోతే భవిష్యత్తులో భారీ మూల్యం చెల్లించుకోవాల్సి వస్తుందని విశ్లేషకులు భావిస్తున్నారు.
