పశ్చిమ బెంగాల్ అసెంబ్లీ ఎన్నికల ఫలితాల్లో బీజేపీ చారిత్రక విజయం దిశగా దూసుకుపోతుండటంతో, తృణమూల్ కాంగ్రెస్ (టీఎంసీ) అధినేత్రి మమతా బెనర్జీ రంగంలోకి దిగారు. రాష్ట్రంలో సుదీర్ఘ పాలన తర్వాత టీఎంసీ ఓటమి అంచున ఉన్నట్లు ట్రెండ్స్ కనిపిస్తున్న తరుణంలో, ఆమె తన పార్టీ ఏజెంట్లకు మరియు కార్యకర్తలకు ఒక వీడియో సందేశాన్ని విడుదల చేశారు. ఫలితాల సరళి ఎలా ఉన్నా సరే, ఎవరూ కౌంటింగ్ కేంద్రాలను వదిలి వెళ్లకూడదని ఆమె గట్టిగా ఆదేశించారు.
ఈ సందర్భంగా మమతా బెనర్జీ కేంద్ర ప్రభుత్వం మరియు బీజేపీపై తీవ్రమైన ఆరోపణలు చేశారు. ఇది పూర్తిగా బీజేపీ పన్నిన కుట్ర అని, ఉద్దేశపూర్వకంగానే టీఎంసీ ఆధిక్యంలో ఉన్న స్థానాల వార్తలను బయటకు రానీయకుండా తొక్కిపెడుతున్నారని ఆమె మండిపడ్డారు. కొన్ని చోట్ల ఈవీఎంలలో తేడాలు ఉన్నాయని, సుమారు 100 నియోజకవర్గాల్లో కౌంటింగ్ను కావాలనే నిలిపివేశారని ఆమె ఆరోపించారు. కేంద్ర బలగాలను అడ్డుపెట్టుకుని తమ పార్టీ కార్యాలయాలపై దాడులు చేస్తున్నారని దీదీ విమర్శించారు.
నిరాశ చెందవద్దని, ఇంకా చాలా రౌండ్ల కౌంటింగ్ మిగిలి ఉందని మమత తన కేడర్లో ధైర్యం నింపే ప్రయత్నం చేశారు. “పులి పిల్లల్లా పోరాడండి.. సూర్యాస్తమయం తర్వాత ఫలితాలు మనకే అనుకూలంగా వస్తాయి” అంటూ ఆమె పిలుపునిచ్చారు. ఎన్నికల సంఘం మరియు పోలీసులు కూడా కేంద్రానికి లొంగిపోయి పనిచేస్తున్నారని ఆరోపిస్తూ, చివరి వరకు పోరాడాలని ఆమె తన వీడియో సందేశం ద్వారా పార్టీ శ్రేణులను ఉత్సాహపరిచారు. పశ్చిమ బెంగాల్ రాజకీయాల్లో ఈ పరిణామాలు ఇప్పుడు అత్యంత ఉత్కంఠను రేపుతున్నాయి.
