వైసీపీ ఎమ్మెల్సీ అనంత ఉదయభాస్కర్ (అనంతబాబు)కు రాజమహేంద్రవరం ప్రత్యేక న్యాయస్థానం భారీ షాక్ ఇచ్చింది. తన మాజీ డ్రైవర్ సుబ్రహ్మణ్యం హత్య కేసులో ప్రధాన నిందితుడిగా ఉన్న ఆయనకు గతంలో సుప్రీంకోర్టు మంజూరు చేసిన బెయిల్ను బుధవారం కోర్టు రద్దు చేసింది. సాక్షులను ప్రభావితం చేయడమే కాకుండా, తనపై సాక్ష్యం చెబితే చంపేస్తానని నలుగురు సాక్షులను బెదిరించినట్లు పోలీసుల దర్యాప్తులో నిర్ధారణ కావడంతో న్యాయస్థానం ఈ సంచలన తీర్పును వెలువరించింది.
సుప్రీంకోర్టు బెయిల్ మంజూరు చేసే సమయంలో పెట్టిన నిబంధనలను అనంతబాబు యథేచ్ఛగా ఉల్లంఘించారని బాధితుల ఫిర్యాదు మేరకు కాకినాడ సర్పవరం పోలీసులు గత నెలలోనే ఆయన్ని అరెస్ట్ చేశారు. అప్పటి నుండి ఆయన రాజమహేంద్రవరం సెంట్రల్ జైలులోనే రిమాండ్ ఖైదీగా ఉన్నారు. తాజాగా బెయిల్ పూర్తిగా రద్దు కావడంతో, ఇకపై విచారణ పూర్తయ్యే వరకు ఆయన జైలులోనే ఉండాల్సిన పరిస్థితి ఏర్పడింది. బెయిల్పై ఉండి వ్యవస్థను తప్పుదోవ పట్టించడంపై న్యాయస్థానం తీవ్ర ఆగ్రహం వ్యక్తం చేసింది.
మే 2022లో జరిగిన ఈ హత్య కేసులో మే 20 నుంచి రెగ్యులర్ విచారణ ప్రారంభం కానుంది. హత్య చేసిన అనంతరం మృతదేహాన్ని బాధితుడి ఇంటి వద్దే వదిలివెళ్లడం (డోర్ డెలివరీ) అప్పట్లో దేశవ్యాప్తంగా కలకలం సృష్టించింది. తొలుత రోడ్డు ప్రమాదంగా చిత్రీకరించే ప్రయత్నం చేసినా, తీవ్ర నిరసనల మధ్య పోలీసులు ఆయన్ని నిందితుడిగా చేర్చారు. విచారణ సమయంలో నిందితుడు బయట ఉంటే సాక్ష్యాలు తారుమారయ్యే అవకాశం ఉందన్న ప్రాసిక్యూషన్ వాదనతో కోర్టు ఏకీభవించి ఈ నిర్ణయం తీసుకుంది.
