నంద్యాల రాజకీయ గడ్డపై మరో భూమా వారసురాలి గర్జన వినిపించబోతోంది. దివంగత భూమా నాగిరెడ్డి, శోభా నాగిరెడ్డిల ద్వితీయ కుమార్తె, టాలీవుడ్ హీరో మంచు మనోజ్ భార్య అయిన భూమా మౌనిక రెడ్డి రాబోయే ఎన్నికల్లో ప్రత్యక్ష రాజకీయ బరిలోకి దిగడం ఖాయమైంది. ఇటీవల ఈ దంపతులు కలిసి ప్రారంభించిన ‘ఐక్య ధైర్య సేన సమితి’ కేవలం సేవా కార్యక్రమాలకే పరిమితం కాదని, మౌనిక రాజకీయ అరంగేట్రానికి అది బలమైన పునాది అని భర్త మంచు మనోజ్ స్పష్టం చేశారు. దీంతో భూమా నాగిరెడ్డి ఆశయ సాధన కోసం మౌనిక ఎన్నికల క్షేత్రంలోకి అడుగుపెడుతున్నట్లు వెలువడిన ప్రకటన ఇప్పుడు ఆంధ్రప్రదేశ్ రాజకీయాల్లో హాట్ టాపిక్గా మారింది.
భూమా కుటుంబానికి చెందిన కీలక నాయకురాలిగా మౌనిక రెడ్డికి రాజకీయాలు కొత్తేమీ కాదు. గతంలో భూమా నాగిరెడ్డి మరణం తర్వాత జరిగిన ఉప ఎన్నికల్లో తన సోదరి భూమా అఖిలప్రియ విజయం కోసం ఆమె గర్భిణీగా ఉన్నప్పటికీ పాదయాత్రలు, ప్రసంగాలతో ప్రజలను ఎంతగానో ఆకట్టుకున్నారు. మౌనికలో ఉన్న వాగ్ధాటి, ప్రజలతో మమేకమయ్యే నైజం భూమా అనుచరుల్లో కొత్త ఉత్సాహాన్ని నింపుతున్నాయి. కేవలం ఒక సెలబ్రిటీ భార్యగానే కాకుండా, కష్టాల్లో ఉన్న కార్యకర్తలకు, ప్రజలకు అండగా నిలిచే ధైర్యవంతురాలిగా పాత నంద్యాల జిల్లాలో ఆమెకు ఇప్పటికే మంచి గుర్తింపు ఉంది.
ప్రస్తుతం ఆళ్లగడ్డ నియోజకవర్గంలో సోదరి భూమా అఖిలప్రియ ఎమ్మెల్యేగా ప్రాతినిధ్యం వహిస్తుండగా, మౌనిక రెడ్డి మాత్రం సొంతంగా తన రాజకీయ భవితవ్యాన్ని నిర్మించుకోవాలని భావిస్తున్నారు. తన తండ్రికి కంచుకోట లాంటి నంద్యాల నియోజకవర్గం లేదా దాని సమీప ప్రాంతాల నుండి ఆమె అసెంబ్లీ బరిలోకి దిగే అవకాశం ఉందని రాజకీయ వర్గాలు అంచనా వేస్తున్నాయి. అయితే మౌనిక పోటీ చేయడం ఖాయమని మనోజ్ ప్రకటించినప్పటికీ, ఆమె ఏ పార్టీ నుండి బరిలోకి దిగుతారనే విషయాన్ని మాత్రం ప్రస్తుతానికి సస్పెన్స్గా ఉంచారు. భూమా మౌనిక రెడ్డి ఎంట్రీతో నంద్యాల, ఆళ్లగడ్డ పాలిటిక్స్ రాబోయే రోజుల్లో మరింత ఆసక్తికరంగా మారబోతున్నాయి.
