ప్రభుత్వ వ్యయాన్ని తగ్గించడంతో పాటు, ప్రజలకు ఆదర్శంగా నిలవాలనే ఉద్దేశంతో టీడీపీ రాష్ట్ర అధ్యక్షుడు, గాజువాక ఎమ్మెల్యే పల్లా శ్రీనివాసరావు ఒక కీలక నిర్ణయం తీసుకున్నారు. తనకు ప్రభుత్వపరంగా కేటాయించిన బుల్లెట్ ప్రూఫ్ వాహనాన్ని ఆయన తిరిగి పోలీస్ శాఖకు అప్పగించారు. ప్రధాని నరేంద్ర మోదీ, ముఖ్యమంత్రి నారా చంద్రబాబు నాయుడు ఇచ్చిన పిలుపులకు అనుగుణంగా, “నా దేశం – నా బాధ్యత” అనే ఉన్నతమైన స్ఫూర్తితో తనకున్న భద్రతా వలయాన్ని భారీగా కుదించుకుంటున్నట్లు ఆయన అధికారికంగా ప్రకటించారు.
ప్రస్తుతం పల్లా శ్రీనివాసరావుకు వై-కేటగిరీ (Y-Category) భద్రత ఉంది. ఇందులో భాగంగా ప్రభుత్వం ఒక బుల్లెట్ ప్రూఫ్ వాహనాన్ని కేటాయించగా, ప్రభుత్వ ధనాన్ని ఆదా చేయాలనే ఉద్దేశంతో దాన్ని నిరాకరిస్తూ వెనక్కి పంపారు. దీంతో పాటు తన సెక్యూరిటీ కోసం ఉన్న 2+2 గన్మన్ల స్థానంలో కేవలం 1+1 సిబ్బంది సరిపోతారని అధికారులకు సూచించారు. ఇకపై తాను ఎలాంటి ఆడంబరాలు లేకుండా సొంత వాహనంలోనే నియోజకవర్గంలో పర్యటిస్తానని, గ్రీన్ ఛానల్, అదనపు ఎస్కార్ట్ వంటి ప్రోటోకాల్ సౌకర్యాలను కూడా అస్సలు వినియోగించబోనని ఆయన స్పష్టం చేశారు.
ఈ సందర్భంగా పల్లా శ్రీనివాసరావు మాట్లాడుతూ.. పశ్చిమాసియాలో నెలకొన్న అంతర్జాతీయ ఉద్రిక్తతల నేపథ్యంలో పెట్రోల్, డీజిల్ వాడకాన్ని తగ్గించాలని ప్రధాని మోదీ సూచించారని, అలాగే దుబారా ఖర్చులకు స్వస్తి పలికి పొదుపు పాటించాలని సీఎం చంద్రబాబు పిలుపునిచ్చారని గుర్తుచేశారు. వారి మాటల స్ఫూర్తితోనే తాను ఈ నిర్ణయం తీసుకున్నానని వివరించారు. ఇదే పొదుపు మంత్రాన్ని పాటిస్తూ, ఈసారి తెలుగుదేశం పార్టీ ప్రతిష్టాత్మక ‘మహానాడు’ను కూడా సాంకేతికతను వాడుకుంటూ ఈ-డిజిటల్, ఆన్లైన్ వేదికగా నిర్వహిస్తున్నట్లు వెల్లడించారు. ప్రజాప్రతినిధులు ఆడంబరాలను తగ్గించుకుంటే ప్రజలకు మరింత చేరువ కావచ్చనే సందేశాన్ని ఆయన తన చర్య ద్వారా నిరూపించారు.
