బెంగళూరులో నిర్వహించిన ఒక మీడియా సదస్సులో తెలంగాణ ముఖ్యమంత్రి ఎనుముల రేవంత్ రెడ్డి కేంద్ర ప్రభుత్వంపై తీవ్ర స్థాయిలో విమర్శలు గుప్పించారు. దేశంలో ప్రధానమంత్రి, రాష్ట్రపతి, హోంమంత్రి, రక్షణమంత్రి వంటి అత్యున్నత పదవులన్నీ ఉత్తరాది నేతలకే కట్టబెడుతున్నారని ఆయన ఆరోపించారు. కేంద్రానికి అత్యధికంగా పన్నులు చెల్లిస్తున్న దక్షిణాది రాష్ట్రాలను కేవలం ఆదాయ వనరుగానే చూస్తున్నారని మండిపడ్డారు. తాము పన్నులు చెల్లిస్తూ, ఢిల్లీకి సెల్యూట్ చేస్తూ దేశంలో రెండో శ్రేణి పౌరులుగా బతకడానికి సిద్ధంగా లేమంటూ దక్షిణాది ఆత్మగౌరవ వాదాన్ని ఆయన బలంగా వినిపించారు.
పెట్టుబడుల ఆకర్షణ, గుజరాత్ మోడల్పై కూడా రేవంత్ రెడ్డి సంచలన వ్యాఖ్యలు చేశారు. గుజరాత్ తనంతట తానుగా పెట్టుబడులను ఆకర్షించడం లేదని, బలవంతంగా అక్కడ పెట్టుబడులు పెట్టేలా చేస్తున్నారని విమర్శించారు. తెలంగాణకు వేరే ఏ భారతీయ రాష్ట్రంతోనూ పోటీ లేదని, చైనా, జపాన్, దక్షిణ కొరియా వంటి అంతర్జాతీయ దేశాలే తమకు పోటీ అని ప్రకటించారు. తెలంగాణను “చైనా + 1” ప్రత్యామ్నాయంగా మార్చి, అంతర్జాతీయ స్థాయిలో చైనాను రీప్లేస్ చేయడమే తన నినాదమని స్పష్టం చేశారు.
రాష్ట్రంలో చెరువుల కబ్జాల నిరోధానికి ఏర్పాటు చేసిన ‘హైడ్రా’ (HYDRAA) పేరును హిట్లర్కు ఇష్టమైన పదం నుండి స్ఫూర్తి పొంది పెట్టానని రేవంత్ రెడ్డి వెల్లడించారు. ఇందులో 3,000 మంది రిటైర్డ్ ఆర్మీ సిబ్బందిని నియమించామని, ఇకపై చెరువులను ఆక్రమించడానికి ఎవరూ సాహసించలేరని చెప్పారు. అలాగే డ్రగ్స్ నిర్మూలనకు ‘ఈగిల్ ఫోర్స్’, ఆర్టిఫిషియల్ ఇంటెలిజెన్స్ యుగానికి అనుగుణంగా ‘స్కిల్స్ యూనివర్సిటీ’, మరియు మహిళా సాధికారత కోసం ఆర్టీసీ బస్సుల్లో ఉచిత ప్రయాణం, సోలార్ ప్యానెల్ యూనిట్లు వంటి విప్లవాత్మక నిర్ణయాలను తమ ప్రభుత్వం అమలు చేస్తోందని ఆయన వివరించారు.
