ఆంధ్రప్రదేశ్ విద్యా రంగంలో ఒక సరికొత్త మైలురాయి నమోదైంది. ఆధ్యాత్మిక నగరమైన తిరుపతిని అంతర్జాతీయ స్థాయి విద్యా హబ్గా తీర్చిదిద్దే లక్ష్యంతో, మైసూరుకు చెందిన ప్రతిష్ఠాత్మక ‘జగద్గురు శ్రీ శివరాత్రీశ్వర (జేఎస్ఎస్) మహావిద్యాపీఠం’ తమ ఆఫ్-క్యాంపస్ను తిరుపతిలో ఏర్పాటు చేయడానికి ముందుకొచ్చింది. ఈ మేరకు అమరావతిలో రాష్ట్ర విద్యాశాఖ మంత్రి నారా లోకేశ్ సమక్షంలో ఏపీ ఉన్నత విద్యామండలి, జేఎస్ఎస్ సంస్థల మధ్య గురువారం కీలక అవగాహన ఒప్పందం (MOU) కుదిరింది. ఏపీ ఉన్నత విద్యాశాఖ కమిషనర్ నారాయణ భరత్ గుప్తా, జేఎస్ఎస్ ప్రొ ఛాన్సలర్ డా.బి.సురేష్ ఈ ఒప్పంద పత్రాలపై సంతకాలు మార్చుకున్నారు.
నాక్ (NAAC) నుంచి అత్యున్నత ‘A++’ గుర్తింపు పొందిన జేఎస్ఎస్ అకాడమీ, తిరుపతిలో నిర్మించబోయే సరికొత్త క్యాంపస్లో ఐదు సమగ్ర విద్యా పాఠశాలలను (Schools) నెలకొల్పనుంది. ఇందులో అడ్వాన్స్డ్ ఇంజినీరింగ్, బయోటెక్నాలజీ, హెల్త్కేర్ అండ్ అలైడ్ సైన్సెస్, ఆర్టిఫిషియల్ ఇంటెలిజెన్స్ (AI), సెమీకండక్టర్ అప్లికేషన్స్, లా మరియు మేనేజ్మెంట్ వంటి వినూత్న విభాగాలలో మొత్తం 74 రకాల కోర్సులను ప్రవేశపెట్టనున్నారు. ఈ క్యాంపస్ పూర్తిస్థాయిలో అందుబాటులోకి వస్తే దాదాపు 10 వేల మందికి పైగా విద్యార్థులకు ఉన్నత ప్రమాణాలతో కూడిన ఉచిత/ఉన్నత విద్య లభించడమే కాకుండా, రీసెర్చ్ కోసం ఆరు ప్రత్యేక ‘సెంటర్స్ ఆఫ్ ఎక్సలెన్స్’ కూడా ఇక్కడ కొలువుదీరనున్నాయి.
ముఖ్యమంత్రి చంద్రబాబు నాయుడు ఆశయమైన ‘స్వర్ణాంధ్ర విజన్’ కు అనుగుణంగా ఈ ప్రాజెక్టును అత్యంత వేగంగా ముందుకు తీసుకెళ్లనున్నారు. తిరుపతిలో క్యాంపస్ నిర్మాణానికి అయ్యే పూర్తి వ్యయాన్ని జేఎస్ఎస్ మహావిద్యాపీఠమే భరించనుండగా, రాష్ట్ర ప్రభుత్వం సింగిల్-విండో విధానం ద్వారా అవసరమైన భూమి, చట్టబద్ధమైన అనుమతులను వేగంగా కల్పించనుంది. ఈ మెగా విద్యా ప్రాజెక్టు ద్వారా రాయలసీమ ప్రాంతంలో ప్రత్యక్షంగా మరియు పరోక్షంగా 20 వేలకు పైగా ఉద్యోగ, ఉపాధి అవకాశాలు లభిస్తాయని మంత్రి నారా లోకేశ్ ఆశాభావం వ్యక్తం చేశారు. ఈ చారిత్రాత్మక కార్యక్రమంలో జేఎస్ఎస్ ఏహెచ్ఈఆర్ రిజిస్ట్రార్ డా.బి.మంజునాథ మరియు ఉన్నతాధికారులు పాల్గొన్నారు.
