కృత్రిమ మేధ (ఏఐ) సాంకేతికతను దుర్వినియోగం చేస్తూ, ఓ మైనర్ బాలికను బ్లాక్మెయిల్కు గురిచేసిన ట్యూషన్ టీచర్ను విశాఖపట్నం సైబర్ క్రైమ్ పోలీసులు అరెస్ట్ చేశారు. తన వద్ద ట్యూషన్ చదువుకుంటున్న బాలిక సాధారణ ఫొటోలను సేకరించిన షణ్ముఖ్ హితేష్ అనే నిందితుడు, ఏఐ టూల్స్ సహాయంతో వాటిని అశ్లీల చిత్రాలుగా మార్ఫింగ్ చేశాడు. తాను చెప్పినట్లు వినకపోతే ఆ ఫొటోలను ఇతరులకు పంపిస్తానని సదరు బాలికను తీవ్రంగా భయభ్రాంతులకు గురిచేశాడు.
నిందితుడి వేధింపులు మితిమీరడంతో, ఆ బాలిక ధైర్యంగా విషయాన్ని తన తల్లిదండ్రులకు వివరించింది. అప్రమత్తమైన కుటుంబ సభ్యులు వెంటనే విశాఖ సైబర్ క్రైమ్ పోలీస్ స్టేషన్లో ఫిర్యాదు చేయగా, రంగంలోకి దిగిన పోలీసులు సాంకేతిక ఆధారాలతో నిందితుడిని అదుపులోకి తీసుకున్నారు. నిందితుడిపై పోక్సో (POCSO) చట్టంతో పాటు ఐటీ యాక్ట్లోని పలు సెక్షన్ల కింద కేసు నమోదు చేసి, కోర్టులో హాజరుపరచగా న్యాయస్థానం అతనికి 14 రోజుల జ్యుడీషియల్ రిమాండ్ విధించింది.
ఏఐ సాంకేతికతను వాడుకుని మైనర్లను లక్ష్యంగా చేసుకుని జరుగుతున్న సైబర్ నేరాలకు ఈ ఘటన నిదర్శనమని పోలీసులు పేర్కొన్నారు. పిల్లల ఫొటోలను సామాజిక మాధ్యమాల్లో పంచుకునే సమయంలో తల్లిదండ్రులు ఎంతో అప్రమత్తంగా ఉండాలని సూచించారు. ఒకవేళ ఎలాంటి ఆన్లైన్ బెదిరింపులు లేదా వేధింపులు ఎదురైనా ఆలస్యం చేయకుండా వెంటనే పోలీసులను సంప్రదించాలని కోరారు. ఈ కేసులో ఇంకా ఎవరైనా బాధితులు ఉన్నారా అనే కోణంలో పోలీసులు దర్యాప్తును ముమ్మరం చేశారు.
