ఎగువ ప్రాంతాల నుంచి ముంచెత్తుతున్న భారీ వరద ప్రవాహంతో భద్రాచలం వద్ద గోదావరి నది రోజురోజుకూ ఉద్ధృతంగా ప్రవహిస్తోంది. నది నీటిమట్టం ప్రమాదకర స్థాయికి చేరుకోవడంతో భద్రాచలం పరివాహక ప్రాంతంలో అధికార యంత్రాంగం హై అలర్ట్ ప్రకటించింది. ప్రస్తుతం గోదావరి నీటిమట్టం 48 అడుగులకు చేరుకోవడంతో అధికారులు అధికారికంగా రెండో ప్రమాద హెచ్చరిక (Second Danger Warning) జారీ చేశారు.
నదిలోకి వరద ప్రవాహం విపరీతంగా పెరుగుతుండటంతో ప్రాజెక్ట్ నుంచి దిగువ ప్రాంతాలకు ప్రస్తుతం 11.44 లక్షల క్యూసెక్కుల నీటిని విడుదల చేస్తున్నారు. వరద పరిస్థితిని కంట్రోల్ రూమ్ ద్వారా అధికారులు ఎప్పటికప్పుడు నిశితంగా పర్యవేక్షిస్తున్నారు. ఎగువ నుండి వస్తున్న వరద ఇలాగే కొనసాగితే నీటిమట్టం మరింత పెరిగి 53 అడుగులకు చేరే అవకాశం ఉందని, అదే జరిగితే మూడో ప్రమాద హెచ్చరికను కూడా జారీ చేస్తామని అధికారులు వెల్లడించారు.
గోదావరి ఉధృతి నేపథ్యంలో లోతట్టు ప్రాంతాలు, నదీ పరివాహక గ్రామాల్లోని ప్రజలు తీవ్ర అప్రమత్తంగా ఉండాలని విపత్తు నిర్వహణ శాఖ హెచ్చరించింది. వరద ముంపునకు గురయ్యే అవకాశం ఉన్న ప్రాంతాల ప్రజలు అధికారుల సూచనలను పాటిస్తూ సురక్షిత ప్రాంతాలకు లేదా పునరావాస కేంద్రాలకు తరలేందుకు సిద్ధంగా ఉండాలని సూచించారు. అత్యవసర సహాయక చర్యల కోసం సహాయక బృందాలను కూడా రంగంలోకి దించినట్లు అధికారులు తెలిపారు.
