రెండు నియోజకవర్గాలు.. రెండు వేర్వేరు లెక్కలు!
2026 తమిళనాడు అసెంబ్లీ ఎన్నికల బరిలోకి దిగిన తమిళగ వెట్రి కళగం (TVK) అధినేత విజయ్కు తొలి అడుగులోనే న్యాయపరమైన చిక్కులు ఎదురయ్యాయి. ఆయన తిరుచ్చి (తూర్పు), పెరంబూర్ నియోజకవర్గాల నుంచి పోటీ చేస్తుండగా, ఆ రెండు చోట్లా దాఖలు చేసిన ఎన్నికల అఫిడవిట్లలో ఆస్తుల వివరాలు పొంతన లేకుండా ఉన్నాయని విఘ్నేష్ అనే వ్యక్తి హైకోర్టులో పిటిషన్ వేశారు. పెరంబూర్లో రూ. 115 కోట్లుగా చూపిన ఆస్తుల విలువ, తిరుచ్చికి వచ్చేసరికి ఏకంగా రూ. 220 కోట్లుగా పేర్కొనడంపై అభ్యంతరాలు వ్యక్తమవుతున్నాయి.
హైకోర్టు సీరియస్ – ఐటీ, ఈసీలకు నోటీసులు..
ఈ పిటిషన్ను విచారించిన మద్రాస్ హైకోర్టు ప్రధాన న్యాయమూర్తి ఎస్.ఏ. ధర్మాధికారి, జస్టిస్ జి. అరుల్ మురుగన్లతో కూడిన ధర్మాసనం ఈ వ్యవహారాన్ని తీవ్రంగా పరిగణించింది. విజయ్తో పాటు ఆదాయపు పన్ను శాఖ డైరెక్టర్ జనరల్, భారత ఎన్నికల సంఘం, మరియు సంబంధిత నియోజకవర్గాల రిటర్నింగ్ అధికారులకు నోటీసులు జారీ చేసింది. కేవలం కొన్ని రోజుల వ్యవధిలోనే దాఖలు చేసిన అఫిడవిట్లలో రూ. 105 కోట్ల భారీ వ్యత్యాసం ఎలా వచ్చిందో వివరణ ఇవ్వాలని న్యాయస్థానం ఆదేశించింది.
రాజకీయంగా ప్రాధాన్యత సంతరించుకున్న వివాదం..
ఎన్నికల పోలింగ్కు సమయం దగ్గరపడుతున్న వేళ ఈ వివాదం తమిళనాడు రాజకీయాల్లో హాట్ టాపిక్గా మారింది. ఆస్తుల వివరాల్లో ఇంత భారీ తేడా ఉన్నా దానికి సంబంధించిన ఎలాంటి అనుబంధ పత్రాలను విజయ్ సమర్పించలేదని పిటిషనర్ ఆరోపిస్తున్నారు. దళపతి విజయ్ తన పొలిటికల్ ఎంట్రీతో రాష్ట్రంలో భారీ మార్పులు వస్తాయని ఆశిస్తున్న తరుణంలో, ఈ ఆస్తుల లొసుగులు ఆయన ప్రత్యర్థులకు గట్టి అస్త్రంగా మారాయి. కోర్టు విచారణ అనంతరం వెలువడే తీర్పు విజయ్ రాజకీయ భవిష్యత్తుపై ప్రభావం చూపే అవకాశం ఉంది.
