కాళేశ్వర ఆలయ పునరుద్ధరణకు సీఎం రేవంత్ శ్రీకారం……….

ఆలయ అభివృద్ధి పనులకు భూమిపూజ..

తెలంగాణ ముఖ్యమంత్రి రేవంత్ రెడ్డి సోమవారం జయశంకర్ భూపాలపల్లి జిల్లాలో పర్యటించారు. ఈ సందర్భంగా ఆయన ప్రముఖ పుణ్యక్షేత్రమైన కాళేశ్వరంలోని కాళేశ్వర ముక్తేశ్వర స్వామి వారిని దర్శించుకుని ప్రత్యేక పూజలు నిర్వహించారు. అనంతరం ఆలయ అభివృద్ధి కోసం ప్రభుత్వం కేటాయించిన రూ.198 కోట్ల నిధులతో చేపట్టబోయే వివిధ నిర్మాణ పనులకు ముఖ్యమంత్రి భూమిపూజ చేశారు. ఆధ్యాత్మిక పర్యాటక రంగంలో కాళేశ్వరానికి పూర్వవైభవం తీసుకువచ్చేలా ఈ పనులు చేపట్టనున్నట్లు అధికారులు తెలిపారు.

మేడిగడ్డ బ్యారేజ్ పరిశీలన – అధికారులతో సమీక్ష..

ఆలయ దర్శనం అనంతరం ముఖ్యమంత్రి మేడిగడ్డ బ్యారేజీకి చేరుకున్నారు. ఎన్డీఎస్ఏ (NDSA) ఛైర్మన్ అనిల్ జైన్‌తో కలిసి బ్యారేజీ పరిస్థితిని, కుంగిన పిల్లర్లను క్షేత్రస్థాయిలో పరిశీలించారు. బ్యారేజీ పునరుద్ధరణ చర్యలపై ఇరిగేషన్ శాఖ ఉన్నతాధికారులతో సమీక్ష నిర్వహించి, తీసుకోవాల్సిన జాగ్రత్తలపై దిశానిర్దేశం చేశారు. ప్రాజెక్టు భద్రత మరియు సాగునీటి సరఫరా విషయంలో ఎటువంటి ఇబ్బందులు కలగకుండా పక్కా ప్రణాళికతో ముందుకు వెళ్లాలని ఆదేశించారు.

నస్తూరిపల్లి సభలో రైతు భరోసా నిధుల విడుదల..

పర్యటనలో భాగంగా కాటారం మండలం నస్తూరిపల్లిలో ఏర్పాటు చేసిన భారీ బహిరంగ సభలో ముఖ్యమంత్రి రేవంత్ రెడ్డి పాల్గొననున్నారు. ఈ సభ వేదికగానే రాష్ట్రవ్యాప్తంగా ఉన్న రైతుల కోసం ‘రైతు భరోసా’ పథకం రెండో విడత నిధులను ఆయన విడుదల చేయనున్నారు. నేరుగా రైతుల ఖాతాల్లో నగదు జమ చేసే ప్రక్రియకు ఇక్కడ శ్రీకారం చుట్టనున్నారు. ఈ సందర్భంగా ప్రభుత్వం అమలు చేస్తున్న సంక్షేమ పథకాలు మరియు జిల్లా అభివృద్ధిపై ముఖ్యమంత్రి కీలక ప్రసంగం చేసే అవకాశం ఉంది.