టాలీవుడ్ విలక్షణ నటుడు అడివి శేష్ తన కెరీర్ ఆరంభంలో ఎదుర్కొన్న ఒక ఆసక్తికరమైన, చేదు అనుభవాన్ని తాజాగా పంచుకున్నారు. క్రియేటివ్ డైరెక్టర్ కృష్ణవంశీ దర్శకత్వంలో 2007లో వచ్చిన సూపర్ హిట్ సినిమా ‘చందమామ’లో మొదట శేష్నే హీరోగా అనుకున్నారట. అయితే, మూడు రోజుల షూటింగ్ పూర్తయిన తర్వాత తనను ఆ ప్రాజెక్ట్ నుండి తప్పించారని, ఆ స్థానంలో నవదీప్ను తీసుకున్నారని శేష్ వెల్లడించారు. అప్పట్లో ఈ సినిమాకు ‘మల్లెపువ్వు’ అనే టైటిల్ను పరిశీలించినట్లు ఆయన గుర్తు చేసుకున్నారు.
ఆ సమయంలో అడివి శేష్ వయస్సు కేవలం 15 ఏళ్లు మాత్రమేనని, అంత లేత వయస్సు ఉన్న కుర్రాడు ఆ పాత్రకు సెట్ అవ్వడం లేదని భావించి డైరెక్షన్ టీమ్ ఈ నిర్ణయం తీసుకున్నట్లు తెలిపారు. సినిమాలో ఒక సీన్ కోసం గడ్డం ఉండాలని అడిగారని, కానీ అప్పటికి తనకు గడ్డం కూడా రాలేదని ఆయన నవ్వుతూ చెప్పారు. హీరోగా అవకాశం చేజారిన తర్వాత మరో పాత్ర ఏదైనా ఉందేమోనని ఆశగా అడిగినా ఫలితం లేకుండా పోయిందని, ఆ సమయంలో ఏం చేయాలో అర్థం కాక చాలా బాధపడ్డానని శేష్ ఆవేదన వ్యక్తం చేశారు.
కెరీర్ మొదట్లో ఇన్ని ఒడిదుడుకులు ఎదుర్కొన్నప్పటికీ, నేడు అడివి శేష్ టాలీవుడ్లో మినిమం గ్యారంటీ హీరోగా ఎదిగారు. ఇటీవల ఆయన నటించిన ‘డెకాయిట్’ సినిమా బాక్సాఫీస్ వద్ద భారీ వసూళ్లను రాబడుతూ సునామీ సృష్టిస్తోంది. ఈ సినిమా ప్రమోషన్లలో భాగంగానే ఆయన తన పాత జ్ఞాపకాలను నెమరువేసుకున్నారు. ఎన్ని ఆటంకాలు ఎదురైనా పట్టుదలతో శ్రమిస్తే విజయం వరిస్తుందని అడివి శేష్ ప్రస్థానం నిరూపిస్తోంది.
