విజయవాడ ఇంద్రకీలాద్రిపై కొలువుదీరిన కనకదుర్గమ్మకు తెలంగాణకు చెందిన ఓ భక్తుడు తన భక్తిని చాటుకున్నారు. నిజామాబాద్ జిల్లాకు చెందిన తోడుపునూరి శ్రీనివాస్ అనే వ్యక్తి సుమారు 107.5 గ్రాముల బరువు కలిగిన బంగారు లక్ష్మీకాసుల హారాన్ని అమ్మవారికి కానుకగా సమర్పించారు. కెంపులు, పచ్చలతో ఎంతో అందంగా పొదిగిన ఈ హారం విలువ ప్రస్తుత మార్కెట్ ధర ప్రకారం సుమారు రూ. 16.70 లక్షల వరకు ఉంటుందని ఆలయ అధికారులు అంచనా వేశారు.
ఈ విశేష కానుకను సమర్పించే సమయంలో వైసిపి ఎమ్మెల్సీ దువ్వాడ శ్రీనివాస్ దాత కుటుంబంతో కలిసి అమ్మవారిని దర్శించుకున్నారు. గర్భాలయంలో ఈ లక్ష్మీకాసుల హారానికి ప్రత్యేక పూజలు నిర్వహించిన అనంతరం, దాతలు స్వయంగా ఆలయ సిబ్బందికి హారాన్ని అందజేశారు. ఈ సందర్భంగా ఆలయ అధికారులు దాత కుటుంబానికి ఘనంగా స్వాగతం పలికారు. వేద పండితులు వారికి ఆశీర్వచనాలు అందించి అమ్మవారి ప్రసాదాలను అందజేశారు.
మరోవైపు, వేసవి సెలవుల దృష్ట్యా ఇంద్రకీలాద్రికి భక్తుల రద్దీ పెరుగుతుండటంతో ఆలయ అధికారులు ముందస్తు ఏర్పాట్లు చేపట్టారు. ఎండ వేడి నుంచి భక్తులకు ఉపశమనం కలిగించేలా చలువ పందిళ్లు, క్యూలైన్లలో తాగునీటి సదుపాయం కల్పించారు. క్యూలైన్లలో వేచి ఉండే భక్తుల కోసం ప్రత్యేకంగా టీవీలను ఏర్పాటు చేశారు, వీటి ద్వారా అమ్మవారి నిత్య పూజా కార్యక్రమాలను భక్తులు ప్రత్యక్షంగా వీక్షించవచ్చని అధికారులు వెల్లడించారు. భక్తులు ఇచ్చే విరాళాలను ఆలయ అభివృద్ధికి వినియోగిస్తామని పాలక మండలి స్పష్టం చేసింది.
