మీరు హాయిగా సోఫాలో కూర్చుని స్మార్ట్ టీవీ చూస్తున్నారా? అయితే జాగ్రత్త! మీరు టీవీని చూస్తుంటే, ఆ టీవీ మిమ్మల్ని నిశితంగా గమనిస్తోందని సైబర్ నిపుణులు హెచ్చరిస్తున్నారు. స్మార్ట్ టీవీల్లో ఉండే ‘ఆటోమేటిక్ కంటెంట్ రికగ్నిషన్’ (ACR) అనే టెక్నాలజీ ద్వారా మీ అలవాట్లు, అభిరుచులు మరియు వ్యక్తిగత సమాచారాన్ని కంపెనీలు సేకరిస్తున్నాయి. కేవలం మీరు చూసే సినిమాలే కాకుండా, మీ ల్యాప్టాప్ను టీవీకి కనెక్ట్ చేసి చూసే వ్యక్తిగత ఫైళ్లు, ఫోటోలు కూడా ఈ నిఘా పరిధిలోకి వచ్చే ప్రమాదం ఉంది.
ఏసీఆర్ టెక్నాలజీ అనేది టీవీ స్క్రీన్పై ప్రసారమయ్యే ప్రతి పిక్సెల్ను లేదా ఆడియోను విశ్లేషించి ఒక ‘డిజిటల్ ఫింగర్ప్రింట్’గా మారుస్తుంది. మీరు నెట్ఫ్లిక్స్ చూస్తున్నా లేదా గేమింగ్ ఆడుతున్నా, ఆ సమాచారాన్ని మెటా డేటా రూపంలో టీవీ తయారీ సంస్థలకు పంపుతుంది. సామ్సంగ్, ఎల్జీ వంటి ప్రముఖ కంపెనీల టీవీలను కేవలం మానిటర్గా వాడుతున్నప్పుడు కూడా డేటా సేకరించబడుతుందని పరిశోధనల్లో తేలింది. ఈ డేటాను ప్రకటనల ఏజెన్సీలకు విక్రయించడం ద్వారా, మీ అభిరుచులకు తగ్గట్లుగా సోషల్ మీడియాలో యాడ్స్ వచ్చేలా ప్లాన్ చేస్తారు.
మీ గోప్యతను కాపాడుకోవడానికి నిపుణులు కొన్ని ముఖ్యమైన సూచనలు చేస్తున్నారు. మీ స్మార్ట్ టీవీ సెట్టింగ్స్లోకి వెళ్లి ‘ACR’, ‘Viewing Data’, లేదా ‘Advertising’ వంటి ఆప్షన్లను వెతికి వాటిని వెంటనే డిసేబుల్ చేయండి. టీవీని సెటప్ చేసే సమయంలో వచ్చే ‘Terms and Conditions’ను జాగ్రత్తగా చదివి, డేటా సేకరణకు సంబంధించిన ఆప్షన్లను నిరాకరించండి. అవసరం లేనప్పుడు వైఫైని డిస్కనెక్ట్ చేయడం ద్వారా మీ వ్యక్తిగత సమాచారం బయటకు వెళ్లకుండా అడ్డుకోవచ్చు. స్మార్ట్ యుగంలో మన ప్రైవసీని కాపాడుకోవడం మన బాధ్యతే!
