పశ్చిమ బెంగాల్ ఎన్నికల ఫలితాల నేపథ్యంలో కేంద్ర హోంమంత్రి అమిత్ షా కీలక వ్యాఖ్యలు చేశారు. తృణమూల్ కాంగ్రెస్ అధినేత్రి మమతా బెనర్జీని ఆమె సొంత నియోజకవర్గంలోనే బీజేపీ నేత సువేందు అధికారి ఓడించారని ఆయన పేర్కొన్నారు. దశాబ్దాలుగా బెంగాల్లో కొనసాగుతున్న అరాచక పాలన, శాంతిభద్రతల క్షీణతకు ఈ ఓటమితో తెరపడిందని, రాష్ట్రంలో ప్రజాస్వామ్య పునరుద్ధరణ ప్రారంభమైందని అమిత్ షా వ్యాఖ్యానించారు.
బెంగాల్లో బీజేపీ సాధించిన ఈ విజయం అసాధారణమైనదని, ఇది రాష్ట్ర చరిత్రలోనే ఒక కీలక మలుపు అని అమిత్ షా అభివర్ణించారు. ఎన్నికల సమయంలో ప్రజలకు ఇచ్చిన ప్రతి హామీని నెరవేర్చే బాధ్యత తమ ప్రభుత్వంపై ఉందని ఆయన స్పష్టం చేశారు. బెంగాల్ను అభివృద్ధి పథంలో నడిపించడమే తమ తదుపరి లక్ష్యమని, అద్భుతమైన మెజారిటీని అందించిన బెంగాల్ ప్రజలకు ఆయన కృతజ్ఞతలు తెలిపారు.
మరోవైపు కాంగ్రెస్ పార్టీ వరుస ఓటములపై కూడా అమిత్ షా స్పందించారు. ఎన్నికల్లో ఎందుకు పరాజయం పాలవుతున్నారో కాంగ్రెస్ నాయకులు ఆత్మపరిశీలన చేసుకోవాలని ఆయన సూచించారు. తప్పులను సరిదిద్దుకోని నాయకులు ఎప్పటికీ నిజమైన విజయాన్ని అందుకోలేరని విమర్శించారు. అలాగే బెంగాల్లో పోలింగ్ను అత్యంత శాంతియుతంగా నిర్వహించిన ఎన్నికల సంఘం, భద్రతా దళాలను ఆయన ఈ సందర్భంగా అభినందించారు.
