హైదరాబాద్ జూబ్లీహిల్స్లో కలకలం రేపిన ‘రిచ్ కిడ్స్ ట్రాప్’ కేసులో పోలీసులు దూకుడు పెంచారు. ఈ కేసులో కీలక నిందితుడైన జతిన్పై తాజాగా మరోసారి పోక్సో (POCSO) చట్టం కింద కేసు నమోదైంది. గతంలో ఒకసారి అరెస్టయి, సాంకేతిక కారణాలతో బయటకు వచ్చిన జతిన్పై ఇప్పుడు మరో బాధితురాలు ఫిర్యాదు చేయడంతో పోలీసులు చర్యలు చేపట్టారు.
శారీరక వేధింపులు.. లక్షల్లో వసూళ్లు
తాజా బాధితురాలు తెలిపిన వివరాల ప్రకారం.. జతిన్ తనను లొంగదీసుకుని శారీరకంగా వాడుకోవడమే కాకుండా, లక్షల రూపాయల నగదును దోచుకున్నాడని జూబ్లీహిల్స్ పోలీసులకు ఫిర్యాదు చేసింది. ఆమె ఫిర్యాదును స్వీకరించిన పోలీసులు కేసు నమోదు చేసి దర్యాప్తును వేగవంతం చేశారు. గతంలో ఇతడిని అరెస్ట్ చేసినప్పుడు కోర్టు రిమాండ్ తిరస్కరించడంతో నిందితుడు స్వేచ్ఛగా బయట తిరుగుతున్నాడు. అయితే, వరుసగా బాధితులు వెలుగులోకి రావడం ఇప్పుడు ప్రాధాన్యత సంతరించుకుంది.
ముఠా పనితీరు – ఇన్స్టాగ్రామే వేదిక
ఈ ముఠా ప్రధానంగా ఇన్స్టాగ్రామ్ వంటి సోషల్ మీడియా వేదికల ద్వారా బాలికలు, యువతులను ట్రాప్ చేసేవారని పోలీసులు గుర్తించారు. ప్రధాన నిందితుడు అర్జున్, అతడి సోదరుడు కలిసి ఖరీదైన కార్లలో యువతులను షికార్లకు తీసుకెళ్లి, వారిపై లైంగిక దాడులకు పాల్పడేవారు. ఆ దృశ్యాలను రహస్యంగా వీడియోలు తీసి, వాటిని చూపించి బ్లాక్మెయిల్ చేస్తూ పెద్ద మొత్తంలో డబ్బులు వసూలు చేయడం వీరి ప్రధాన వ్యూహమని దర్యాప్తులో వెల్లడైంది.
కుటుంబ సభ్యుల సహకారం
ఈ దారుణ నేరాల్లో నిందితులకు వారి తల్లి మరియు మేనమామ కూడా వెన్నుదన్నుగా నిలిచినట్లు పోలీసులు నిర్ధారించారు. నేరం జరిగినప్పుడు సాక్ష్యాలను దాచిపెట్టడం లేదా బాధితులను బెదిరించడంలో వీరి పాత్ర ఉన్నట్లు తేలింది. ఈ సంచలన కేసులో ఇప్పటికే ప్రధాన నిందితులతో సహా పలువురిని పోలీసులు కటకటాల్లోకి నెట్టారు. తాజాగా నమోదైన కేసుతో జతిన్పై చట్టపరమైన ఉచ్చు మరింత బిగుస్తోంది.
