రాయలసీమ ప్రాంతం పారిశ్రామికంగా సరికొత్త చరిత్రను లిఖించబోతోంది. దేశ రక్షణ రంగంలోనే అత్యంత ప్రతిష్ఠాత్మకమైన అడ్వాన్స్డ్ మీడియం కాంబాట్ ఎయిర్క్రాఫ్ట్ (AMCA) ప్రాజెక్టుకు శ్రీ సత్యసాయి జిల్లా పుట్టపర్తిలో శుక్రవారం అంకురార్పణ జరగనుంది. సుమారు రూ.15,803 కోట్ల భారీ వ్యయంతో, 650 ఎకరాల విస్తీర్ణంలో రూపుదిద్దుకోనున్న ఈ ప్రాజెక్టుకు కేంద్ర రక్షణ మంత్రి రాజ్నాథ్ సింగ్, ముఖ్యమంత్రి నారా చంద్రబాబు నాయుడు కలిసి భూమిపూజ చేయనున్నారు. ఈ ప్రాజెక్టు ద్వారా భారతదేశపు మొట్టమొదటి 5వ తరం స్టెల్త్ యుద్ధ విమానాల తయారీ మరియు పరీక్షలు ఇక్కడే జరగనున్నాయి, ఇది దేశ రక్షణ వ్యవస్థలో ఒక ‘గేమ్ ఛేంజర్’గా మారనుంది.
ఈ భారీ ప్రాజెక్టుతో పాటు రక్షణ మరియు డ్రోన్ రంగాలకు చెందిన మరో 12 అనుబంధ పరిశ్రమలకు కూడా అదే వేదికపై శంకుస్థాపన జరగనుంది. వీటి ద్వారా అదనంగా రూ.4,145 కోట్ల పెట్టుబడులు రాష్ట్రానికి రానున్నాయి. కళ్యాణి స్ట్రాటజిక్ సిస్టమ్స్, భారత్ డైనమిక్స్ లిమిటెడ్, హెచ్ఎఫ్ సీఎల్ వంటి ప్రముఖ సంస్థలు తమ విభాగాలను ఇక్కడ ఏర్పాటు చేయబోతున్నాయి. ఈ మొత్తం ప్రాజెక్టుల వల్ల సుమారు 13,500 మందికి పైగా ప్రత్యక్షంగా ఉపాధి లభించడమే కాకుండా, భవిష్యత్తులో మరో లక్ష కోట్ల పెట్టుబడులను ఆకర్షించే అవకాశం ఉందని ప్రభుత్వం అంచనా వేస్తోంది.
ఒకప్పుడు రత్నాలకు, ఆ తర్వాత ఉద్యాన పంటలకు ప్రసిద్ధి చెందిన రాయలసీమ, ఇప్పుడు ‘రక్షణ సీమ’గా అవతరించబోతోంది. కర్నూలులో నిర్మిస్తున్న ‘డ్రోన్ సిటీ’ మరియు పుట్టపర్తిలోని ఏఎంసీఏ ప్రాజెక్టులతో ఈ ప్రాంతం దేశంలోనే కీలకమైన డిఫెన్స్ హబ్గా మారనుంది. మడకశిర, దొనకొండ, నెల్లూరు వంటి ప్రాంతాల్లో కూడా రక్షణ ప్రాజెక్టులు విస్తరించడం వల్ల వెనుకబడిన ప్రాంతమనే ముద్ర తొలగిపోయి, పారిశ్రామికంగా రాయలసీమ నవ శకంలోకి అడుగుపెట్టబోతోంది. ఈ మేరకు ముఖ్యమంత్రి చంద్రబాబు నాయుడు తన పర్యటనలో భాగంగా భారీ బహిరంగ సభలో పాల్గొని రాష్ట్ర అభివృద్ధి ప్రణాళికలను వివరించనున్నారు.
