శ్రీ సత్యసాయి జిల్లా పుట్టపర్తిలో జరిగిన ఏఎంసీఏ (AMCA) స్టెల్త్ ఫైటర్ జెట్ ప్రాజెక్టు శంకుస్థాపన కార్యక్రమంలో రాష్ట్ర ఐటీ, ఎలక్ట్రానిక్స్ శాఖ మంత్రి నారా లోకేష్ ఆసక్తికర ప్రసంగం చేశారు. ప్రధానమంత్రి నరేంద్ర మోదీ, కేంద్ర రక్షణ మంత్రి రాజ్నాథ్ సింగ్, ఏపీ ముఖ్యమంత్రి చంద్రబాబు నాయుడులను ఉద్దేశించి “వీరు ముగ్గురు 75 ఏళ్ల వయసున్న కుర్రాళ్లు” అని ఆయన అభివర్ణించారు. వయసు రీత్యా 75 ఏళ్లు ఉన్నప్పటికీ, వారి పనితీరులో మాత్రం 25 ఏళ్ల యువకుల వేగం కనిపిస్తుందని, ఆ స్పీడును అందుకోవడం ఎవరి వల్లా కాదని లోకేష్ కొనియాడారు. ఈ ముగ్గురి కలయిక అత్యంత పవర్ఫుల్ కాంబినేషన్ అని ఆయన పేర్కొన్నారు.
రక్షణ రంగంపై రాజ్నాథ్ సింగ్ చూపిస్తున్న చొరవను ప్రశంసిస్తూ, ఆయనను ‘ఐరన్ మ్యాన్’గా లోకేష్ అభివర్ణించారు. గతంలో పాకిస్థాన్కు గట్టి బుద్ధి చెప్పిన ‘ఆపరేషన్ సిందూర్’ వెనుక ఉన్న అసలైన శక్తి రాజ్నాథ్ సింగేనని ఆయన గుర్తు చేశారు. ఈ ప్రతిష్టాత్మక ప్రాజెక్టు పుట్టపర్తికి రావడం పట్ల హర్షం వ్యక్తం చేస్తూ, ఇది ఉమ్మడి అనంతపురం జిల్లా చరిత్రనే మార్చివేస్తుందని ధీమా వ్యక్తం చేశారు. గతంలో చంద్రబాబు హయాంలో వచ్చిన ‘కియా’ పరిశ్రమ తరహాలోనే, ఇప్పుడు వస్తున్న రక్షణ రంగ ప్రాజెక్టులు జిల్లా అభివృద్ధికి రిటర్న్ గిఫ్ట్ లాంటివని ఆయన వ్యాఖ్యానించారు.
ఈ ప్రాజెక్టు ద్వారా రాయలసీమ ప్రాంతంలో రక్షణ రంగ హబ్ ఏర్పడబోతోందని, దీనివల్ల భారీగా పెట్టుబడులు మరియు వేల సంఖ్యలో ఉద్యోగ అవకాశాలు వస్తాయని లోకేష్ తెలిపారు. యువత ఈ అద్భుతమైన అవకాశాలను అందిపుచ్చుకుని అభివృద్ధిలో భాగస్వాములు కావాలని ఆయన పిలుపునిచ్చారు. ఏపీని అభివృద్ధి పథంలో నడిపించడంలో కేంద్ర, రాష్ట్ర ప్రభుత్వాల సమన్వయం అద్భుతంగా ఉందని, భవిష్యత్తులో మరిన్ని భారీ ప్రాజెక్టులు రాష్ట్రానికి రానున్నాయని ఆయన ఆశాభావం వ్యక్తం చేశారు. మంత్రి చేసిన ఈ వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి.
