ఆంధ్రప్రదేశ్ ప్రజలకు, ముఖ్యంగా ఆధ్యాత్మిక యాత్రికులకు ఇండిగో ఎయిర్లైన్స్ సంస్థ సరికొత్త తీపి కబురు అందించింది. విజయవాడ ఇంటర్నేషనల్ ఎయిర్పోర్ట్ (గన్నవరం) నుంచి ప్రముఖ పుణ్యక్షేత్రం వారణాసి (కాశీ)కి నేరుగా విమాన సర్వీసులు ప్రారంభం కానున్నాయి. రాబోయే ఆగస్టు 13 నుంచి ఈ లైనర్ అందుబాటులోకి రానుండగా.. ప్రయాణికుల సౌకర్యార్థం ఇండిగో సంస్థ ఇప్పటికే ఈ రూట్కు సంబంధించిన టికెట్ బుకింగ్స్ను కూడా అధికారికంగా ప్రారంభించింది.
ఈ సరికొత్త నాన్-స్టాప్ విమాన సర్వీసులు వారానికి మూడు రోజులు.. అంటే ప్రతి మంగళ, గురు, శనివారాల్లో ప్రయాణికులకు అందుబాటులో ఉంటాయని ఎయిర్లైన్స్ ప్రతినిధులు వెల్లడించారు. షెడ్యూల్ ప్రకారం.. వారణాసి నుంచి మధ్యాహ్నం 3:55 గంటలకు బయలుదేరే విమానం సాయంత్రం 5:50 గంటలకు విజయవాడ చేరుకుంటుంది. తిరుగు ప్రయాణంలో సాయంత్రం 6:20 గంటలకు విజయవాడ నుంచి టేకాఫ్ అయి, రాత్రి 8:15 గంటలకు కాశీకి చేరుకుంటుంది. ఈ విమాన ప్రయాణ టికెట్ ధరలు సుమారు రూ. 6,500 నుండి రూ. 8,000 మధ్యలో ఉండే అవకాశం ఉంది.
రాజధాని అమరావతి ప్రాంతానికి కనెక్టివిటీ పెంచేలా ఏపీ ప్రభుత్వం కేంద్రంతో జరిపిన చర్చలు ఫలించడంతో ఈ కొత్త రూట్ ఖరారైంది. ఇదే సమయంలో రాష్ట్ర ప్రభుత్వం విమానయాన రంగాన్ని మరింత బలోపేతం చేసేందుకు ‘ఏవియేషన్ పాలసీ 2026-2031’ని అమల్లోకి తెచ్చింది. దీని ద్వారా రాష్ట్రవ్యాప్తంగా ప్రతి 150 కిలోమీటర్ల పరిధిలో ఒక విమానాశ్రయం ఉండేలా దగదర్తి, కుప్పం, శ్రీకాకుళం, నాగార్జునసాగర్ తదితర ప్రాంతాల్లో లో-కాస్ట్ ఎయిర్పోర్టులు, వాటర్డ్రోమ్స్ అభివృద్ధి చేయడమే కాకుండా.. దేశంలోని 25 ప్రధాన నగరాలకు, 10 అంతర్జాతీయ ప్రాంతాలకు కనెక్టివిటీ పెంచాలని లక్ష్యంగా పెట్టుకుంది.
