గత కొద్దిరోజులుగా పెరుగుతున్న గరిష్ట ఉష్ణోగ్రతలు, తీవ్రమైన ఉక్కపోతతో తీవ్ర ఇబ్బందులు పడుతున్న హైదరాబాద్ నగరవాసులకు శనివారం సాయంత్రం పెద్ద ఉపశమనం లభించింది. నగరంలోని పలు ప్రధాన ప్రాంతాల్లో హఠాత్తుగా వాతావరణం మారిపోయి, తేలికపాటి నుండి మోస్తరు వర్షం కురిసింది. దీంతో ఒక్కసారిగా చల్లని గాలులు వీచి నగర వాతావరణం పూర్తిగా ఆహ్లాదకరంగా మారింది. వేసవి తాపంతో అల్లాడుతున్న ప్రజలకు ఈ వర్షం ఎంతో ఊరటనిచ్చింది.
శనివారం సాయంత్రం ఐటి కారిడార్ పరిధిలోని గచ్చిబౌలి, మాదాపూర్ సహా జూబ్లీహిల్స్, ఫిల్మ్ నగర్, బోరబండ, యూసుఫ్గూడ, ఎస్ఆర్ నగర్, సనత్నగర్ ప్రాంతాల్లో ఆకాశం మేఘావృతమై జల్లులు కురిశాయి. నగరానికి మరోవైపు ఉన్న ఉప్పల్, ఎల్బీనగర్, వనస్థలిపురం, హయత్నగర్ వంటి ప్రాంతాల్లో కూడా వర్షం కురిసింది. రోడ్లపైకి ఒక్కసారిగా నీరు చేరడంతో వాహనదారులు ఇబ్బంది పడినప్పటికీ, ఎండ తీవ్రత తగ్గడంతో నగరవాసులు సంతోషం వ్యక్తం చేశారు.
హైదరాబాద్ నగర సరిహద్దుల్లోని పరిసర ప్రాంతాల్లో కూడా వాతావరణంలో మార్పులు స్పష్టంగా కనిపించాయి. ముఖ్యంగా పొరుగున ఉన్న రంగారెడ్డి జిల్లాలోని కొహెడ మరియు దాని చుట్టుపక్కల గ్రామీణ ప్రాంతాల్లో ఈ సాయంత్రం భారీ వర్షం కురిసినట్లు సమాచారం. ఏపీలోకి నైరుతి రుతుపవనాలు ప్రవేశించిన తరుణంలో, తెలంగాణలోనూ వాతావరణం చల్లబడి వర్షాలు ప్రారంభం కావడంపై అటు ప్రజలు, ఇటు రైతాంగం హర్షం వ్యక్తం చేస్తున్నారు.
