రాష్ట్రవ్యాప్తంగా అన్ని జిల్లాలు, కమిషనరేట్లకు సంబంధించిన సరిహద్దులు, పోలీస్ స్టేషన్ల పరిధులపై ఒక సమగ్ర ప్రణాళికను రూపొందించాలని తెలంగాణ డీజీపీ సీవీ ఆనంద్ ఉన్నతాధికారులను ఆదేశించారు. డీజీపీ కార్యాలయంలో సోమవారం నాడు జరిగిన ఒక కీలక ఉన్నత స్థాయి సమావేశంలో ఆయన మాట్లాడారు. రాష్ట్రంలో పలుచోట్ల జిల్లాలు, కమిషనరేట్ల సరిహద్దులు, పోలీస్ స్టేషన్ల పరిధులపై తరచూ పోలీసింగ్ వివాదాలు వస్తుండడం సరికాదని, వీటికి వెంటనే పూర్తిస్థాయిలో ఫుల్ స్టాప్ పెట్టాలని ఆయన స్పష్టం చేశారు. ఇటీవల జంట నగరాలు, వాటి శివార్లలో కొత్త జోన్లు రావడం వల్ల ఉత్పన్నమవుతున్న సమస్యలను పరిష్కరించేందుకు సర్కిళ్లు, జోన్లు, గ్రామాల పునర్విభజనపై ఖచ్చితమైన సమాచారంతో కూడిన నివేదికను తయారు చేయాలని సూచించారు.
ఈ సమావేశంలో డీజీపీ మరో కీలకమైన అంశాన్ని ప్రస్తావించారు. ఇటీవల కాలంలో నేపాల్కు చెందిన కొందరు పనిమనుషులు పలుచోట్ల ఇళ్లలో నమ్మకంగా చేరుతూనే దొంగతనాలకు, దోపిడీలకు మరియు కొన్నిచోట్ల దారుణ హత్యలకు సైతం తెగబడుతుండడం తీవ్ర కలవరానికి గురిచేస్తోందని ఆయన ఆందోళన వ్యక్తం చేశారు. ఇందుకోసం రాష్ట్రవ్యాప్తంగా వివిధ ఇళ్లలో, సంస్థలలో పని చేస్తున్న నేపాలీ పనివాళ్లు ఎంత మంది ఉన్నారు, వారి గత నేర చరిత్ర ఏమిటి, నేపాల్లో వారు ఏ ప్రాంతానికి చెందినవారనే పూర్తి వివరాలను సేకరించి, ఒక సమగ్ర డేటాను సిద్ధం చేయాలని పోలీసు యంత్రాంగాన్ని ఆదేశించారు. దీనివల్ల నేరాలను అదుపు చేయడంతో పాటు, నిందితులను త్వరగా పట్టుకునే అవకాశం ఉంటుందని పేర్కొన్నారు.
అలాగే రాష్ట్రంలో శాంతిభద్రతల పరిరక్షణకు, నేరాల అదుపునకు టెక్నాలజీ ఆధారిత “స్మార్ట్ పోలీసింగ్” విధానాన్ని మరింత విస్తృతంగా వాడాలని డీజీపీ స్పష్టం చేశారు. ఏఐ (ఆర్టిఫిషియల్ ఇంటెలిజెన్స్) ఆధారిత పోలీసింగ్, డ్రోన్ల వాడకం, స్మార్ట్ అప్లికేషన్ల వినియోగంతో పాటు డయల్ 100, రౌడీ షీటర్లపై నిఘా, చోరీ వాహనాల ఆచూకీ కనుగొనడం వంటి వాటిలో ఆధునిక సాంకేతికతను జోడించాలని చెప్పారు. భవిష్యత్తులో ట్రాఫిక్ మేనేజ్మెంట్ అండ్ రోడ్ ట్రాన్స్పోర్ట్ బ్యూరోతో పాటు ఆహార కల్తీ నిరోధకానికి ప్రత్యేక వ్యవస్థలను ఏర్పాటు చేయాల్సిన అవసరం ఉందన్నారు. ఈ సమావేశంలో హోంశాఖ ముఖ్య కార్యదర్శి శిఖా గోయల్, ఇతర సీనియర్ ఐపీఎస్ అధికారులు అభిలాష్ బిస్త్, విజయ్ కుమార్, సజ్జన్నార్, తరుణ్ జోషి తదితరులు పాల్గొన్నారు.
