డాక్టర్ బి.ఆర్. అంబేద్కర్ కోనసీమ జిల్లా ముమ్మిడివరం నియోజకవర్గంలో తీవ్ర కలకలం రేపుతూ ఒక ఆక్వా రైతు దారుణ హత్యకు గురయ్యారు. ఐ.పోలవరం మండలం మురమళ్ల గ్రామంలో ఈ ఘోర ఘటన వెలుగుచూసింది. స్థానిక ఆక్వా రైతు దాట్ల రామకృష్ణరాజు తన రొయ్యల చెరువుల పర్యవేక్షణ కోసం ఒడిశా రాష్ట్రానికి చెందిన నలుగురు వలస కూలీలను పనికి పెట్టుకున్నారు. వారిని పూర్తిగా నమ్మి బాధ్యతలు అప్పగించగా, బుధవారం పనుల విషయంలో జరిగిన ఒక చిన్నపాటి గొడవ చివరకు యజమాని ప్రాణాలనే బలిగొంది.
ప్రాథమిక విచారణలో నిందితులు గంజాయి మత్తులో ఉన్నట్లు పోలీసులు గుర్తించారు. చెరువు వద్ద పనులకు సంబంధించి యజమాని రామకృష్ణరాజు ప్రశ్నించగా, గంజాయి నిషాలో ఉన్న కూలీలు ఆగ్రహానికి గురయ్యారు. విచక్షణ కోల్పోయి రామకృష్ణరాజుపై బండరాయితో దారుణంగా దాడి చేసి హతమార్చారు. అనంతరం ఆధారాలు దొరకకూడదనే ఉద్దేశంతో మృతదేహానికి భారీ రాళ్లు కట్టి, రొయ్యల చెరువు నీటిలోనే పడేసి అక్కడ నుండి పరారయ్యారు.
బుధవారం నుంచి రామకృష్ణరాజు ఇంటికి రాకపోవడంతో ఆందోళన చెందిన కుటుంబ సభ్యులు చెరువు వద్దకు వెళ్లి గాలించగా మృతదేహం బయటపడింది. సమాచారం అందుకున్న ముమ్మిడివరం పోలీసులు వెంటనే రంగంలోకి దిగి గాలింపు చర్యలు చేపట్టారు. నిందితులను కాకినాడ సమీపంలో అదుపులోకి తీసుకున్నారు. ఈ ఘటనా స్థలాన్ని పరిశీలించి కేసు నమోదు చేసిన పోలీసులు, మృతదేహాన్ని పోస్టుమార్టం నిమిత్తం ఆసుపత్రికి తరలించారు. ఈ దారుణ హత్యతో మురమళ్ల గ్రామంలో విషాద ఛాయలు అలుముకున్నాయి. అలాగే వలస కూలీల పూర్తి వివరాలను సేకరించేలా పటిష్ట చర్యలు తీసుకోవాలని స్థానికులు డిమాండ్ చేస్తున్నారు.
