ఆంధ్రప్రదేశ్లోని చంద్రగిరి నియోజకవర్గ ఎమ్మెల్యే పులివర్తి నాని సతీమణి పులివర్తి సుధారెడ్డి న్యాయవాద వృత్తిలోకి అధికారికంగా అడుగుపెట్టారు. విజయవాడలో ఏపీ బార్ కౌన్సిల్ నిర్వహించిన కార్యక్రమంలో ఆమె తన ‘ఎన్రోల్మెంట్’ పట్టాను అందుకున్నారు. ప్రతిష్టాత్మక ఆల్ ఇండియా బార్ ఎగ్జామినేషన్ (AIBE) రాసి అర్హత సాధించిన తర్వాతే ఆమె ఈ పట్టాను స్వీకరించారు. రాజకీయ నేపథ్యం ఉన్న కుటుంబం నుంచి వచ్చినప్పటికీ, తనకంటూ ఒక ప్రత్యేక గుర్తింపును సాధించాలనే లక్ష్యంతో ఆమె ఈ ఘనతను అందుకున్నారు.
గతంలో కుటుంబ బాధ్యతలు, వ్యాపార వ్యవహారాల వల్ల చదువుకు కొంత విరామం ఇచ్చినప్పటికీ.. పట్టుదలతో చదివి ఆమె లాయర్ అయ్యారు. తన భర్త పులివర్తి నాని ఎమ్మెల్యేగా బాధ్యతలు నిర్వర్తిస్తుండగా, కుమారుడు వినీల్ వ్యాపార రంగంలో రాణిస్తున్నారు. వీరిద్దరి ప్రోత్సాహం, కుటుంబ మద్దతు వల్లే తాను అనుకున్న లక్ష్యాన్ని చేరుకోగలిగానని సుధారెడ్డి తెలిపారు. కేవలం సమాజంలో గొంతు ఎత్తి ప్రశ్నించడం కంటే, న్యాయ పరిజ్ఞానంతో బాధితులకు చట్టపరంగా అండగా నిలబడాలనే ఉద్దేశంతోనే ఈ వృత్తిని ఎంచుకున్నట్లు ఆమె వెల్లడించారు.
ఈ పోటీ ప్రపంచంలో మహిళలు అన్ని రంగాల్లోనూ దూసుకుపోవాలని, చదువుకోవడానికి వయసుతో అస్సలు సంబంధం లేదని ఆమె ఈ సందర్భంగా సూచించారు. భార్య సాధించిన ఈ విజయానికి ఎంతో గర్విస్తూ ఎమ్మెల్యే పులివర్తి నాని సోషల్ మీడియా వేదికగా ఆమెకు అభినందనలు తెలియజేశారు. అమరావతి హైకోర్టు ప్రాంగణంలో సుధారెడ్డి తన కుమారుడితో కలిసి దిగిన ఫొటోలు ప్రస్తుతం నెట్టింట వైరల్ అవుతున్నాయి. కుటుంబ బాధ్యతలను, వృత్తిని సమతుల్యం చేసుకుంటూ ముందుకు సాగుతున్న ఆమె ప్రయాణం చాలా మంది మహిళలకు నూతన స్ఫూర్తిని అందిస్తోంది.
