ప్రకాశం జిల్లా అద్దంకి మండలం శంఖవరప్పాడు వద్ద ఇద్దరు ఎస్సైలు ప్రయాణిస్తున్న కారు ప్రమాదానికి గురైన ఘటనలో, వాహనంలో గంజాయి, మద్యం బాటిళ్లు బయటపడటం రాష్ట్రవ్యాప్తంగా తీవ్ర కలకలం రేపింది. ఆ కారు ఒక ఆటోను ఢీకొనడంతో స్థానికులు వారిని చుట్టుముట్టి వీడియోలు తీయగా, అవి సోషల్ మీడియాలో వైరల్ అయ్యాయి. ఈ ఘటనపై మాజీ ముఖ్యమంత్రి వైఎస్ జగన్‌మోహన్ రెడ్డి సోషల్ మీడియా వేదికగా తీవ్రంగా స్పందిస్తూ ముఖ్యమంత్రి చంద్రబాబు నాయుడిని నేరుగా ప్రశ్నించారు.
గంజాయి, మద్యం అక్రమ రవాణాను అరికట్టాల్సిన బాధ్యత గల పోలీసుల వాహనంలోనే అవి లభించడం రాష్ట్రంలో శాంతిభద్రతల పరిస్థితి ఎంతలా దిగజారిపోయిందో చెప్పడానికి నిదర్శనమని జగన్ ఆరోపించారు. మద్యం మత్తులో ఆటోను ఢీకొట్టడమే కాకుండా, వీడియోలు తీసిన స్థానికులపై కేసులు పెడతామని సీఐ బెదిరించడం పాలనా వైఫల్యానికి అద్దం పడుతోందని మండిపడ్డారు. ఈ వ్యవహారంపై నిష్పక్షపాత విచారణ జరిపి తప్పు చేసిన పోలీసు అధికారులపై కఠిన చర్యలు తీసుకోవాలని డిమాండ్ చేశారు.
అయితే ఈ ఆరోపణలపై ప్రకాశం జిల్లా ఎస్పీ హర్షవర్ధన్ రాజు స్పష్టతనిచ్చారు. పోలీసులు గంజాయి తరలిస్తున్నారనేది పూర్తిగా అవాస్తవమని, చోరీ కేసుల విచారణలో భాగంగా మఫ్టీలో వెళ్తున్న సంతమాగులూరు, బల్లికురవ ఎస్సైలు ఓ అనుమానిత యువకుడిని వెంబడించారని తెలిపారు. ఆ యువకుడు బ్యాగును అక్కడే వదిలేసి పారిపోవడంతో, అందులోని గంజాయి, మద్యాన్ని స్వాధీనం చేసుకుని వస్తుండగా బైక్‌ను తప్పించబోయి ప్రమాదవశాత్తూ ఆటోను ఢీకొన్నారని, ఎస్సైలు మద్యం సేవించలేదని ఎస్పీ వివరించారు.
