పెళ్లి పేరుతో ఓ ఎన్ఆర్ఐ (NRI)ని మోసం చేశారనే ఆరోపణలు ఎదుర్కొంటున్న సినీ నటి, బిగ్ బాస్ ఫేం అషు రెడ్డికి తెలంగాణ హైకోర్టులో చుక్కెదురైంది. తనపై నమోదైన కేసులో దర్యాప్తును నిలిపివేయాలని (Stay) కోరుతూ ఆమె దాఖలు చేసిన పిటిషన్ను న్యాయస్థానం తిరస్కరించింది. ఈ కేసులో పోలీసులు దర్యాప్తు కొనసాగించవచ్చని స్పష్టం చేస్తూ, అషు రెడ్డికి ఎటువంటి మధ్యంతర ఊరట ఇచ్చేందుకు కోర్టు నిరాకరించింది.
ఈ వివాదం వివరాల్లోకి వెళితే.. అషు రెడ్డి మరియు ఆమె తల్లి యశోద రెడ్డి తనను పెళ్లి పేరుతో నమ్మించి సుమారు రూ. 9.35 కోట్ల మేర వసూలు చేసి మోసం చేశారని హైదరాబాద్కు చెందిన ఓ వ్యాపారవేత్త పోలీసులకు ఫిర్యాదు చేశారు. తన కుమారుడిని వివాహం చేసుకుంటానని నమ్మబలికి ఈ భారీ మొత్తాన్ని తీసుకున్నారని సదరు బాధితుడు తన ఫిర్యాదులో పేర్కొన్నారు. దీనిపై స్పందించిన పోలీసులు కేసు నమోదు చేసి విచారణ ప్రారంభించగా, ఆ విచారణను సవాలు చేస్తూ అషు రెడ్డి హైకోర్టును ఆశ్రయించారు.
హైకోర్టులో జరిగిన విచారణలో, అషు రెడ్డి తరఫు న్యాయవాది తమ క్లయింట్పై వచ్చినవన్నీ తప్పుడు ఆరోపణలని, దర్యాప్తును నిలిపివేయాలని కోరారు. అయితే, ప్రభుత్వ తరఫు న్యాయవాది వాదనలు వినిపిస్తూ.. ఈ కేసులో భారీ మొత్తంలో నగదు బదిలీ జరిగిందని, ఇందుకు సంబంధించి ప్రాథమిక ఆధారాలు ఉన్నాయని వివరించారు. ఇరుపక్షాల వాదనలు విన్న న్యాయమూర్తి, కేసు తీవ్రత దృష్ట్యా దర్యాప్తుపై స్టే ఇచ్చేందుకు అంగీకరించలేదు. అంతేకాకుండా, కఠిన చర్యల నుండి మినహాయింపు కావాలన్న అభ్యర్థనను కూడా తోసిపుచ్చారు. తదుపరి విచారణను జూన్ 9వ తేదీకి వాయిదా వేశారు.
