ధర్మశాలలోని హిమాచల్ ప్రదేశ్ క్రికెట్ అసోసియేషన్ స్టేడియం వేదికగా పంజాబ్ కింగ్స్తో జరుగుతున్న కీలక పోరులో ఢిల్లీ క్యాపిటల్స్ టాస్ గెలిచింది. ఢిల్లీ కెప్టెన్ అక్షర్ పటేల్ టాస్ గెలిచి ముందుగా ఫీల్డింగ్ ఎంచుకున్నాడు. ఈ సీజన్లో ఇప్పటివరకు ఆడిన 11 మ్యాచ్ల్లో 7 ఓటములతో సతమతమవుతున్న ఢిల్లీ జట్టు, ఈ మ్యాచ్ కోసం ఏకంగా ఐదు మార్పులతో బరిలోకి దిగింది. పిచ్ ఫ్రెష్గా ఉన్నందున ఫాస్ట్ బౌలర్లకు స్వింగ్ లభిస్తుందని, అందుకే ఛేజింగ్కు మొగ్గు చూపుతున్నట్లు అక్షర్ తెలిపాడు.
టాస్ గెలిచిన అనంతరం అక్షర్ పటేల్ మాట్లాడుతూ.. “ఈ సీజన్లో మాకు కేవలం టాస్ గెలవడం మాత్రమే కలిసి వస్తోంది” అని సరదాగా వ్యాఖ్యానించాడు. తన జట్టు ప్రదర్శన ఆశించిన స్థాయిలో లేకపోయినా, టాస్ విషయంలో మాత్రం అదృష్టం బాగుందని ఆయన చమత్కరించారు. మరోవైపు పంజాబ్ కింగ్స్ కెప్టెన్ శ్రేయస్ అయ్యర్ మాట్లాడుతూ, పిచ్ పరిస్థితిని ముందే అంచనా వేయలేమని, ఆటగాళ్లు సహజ సిద్ధమైన ఆటతీరుతో ఒత్తిడిని అధిగమించాలని సూచించాడు.
ఈ మ్యాచ్ ద్వారా పంజాబ్ కింగ్స్ తరఫున బెన్ డ్వార్షియస్ ఐపీఎల్లోకి అరంగేట్రం చేస్తున్నాడు. గాయం కారణంగా లాకీ ఫెర్గూసన్ దూరం కావడంతో అతనికి ఈ అవకాశం లభించింది. ఢిల్లీ జట్టులో కేఎల్ రాహుల్, డేవిడ్ మిల్లర్, మిచెల్ స్టార్క్ వంటి కీలక ఆటగాళ్లు ఉండగా, పంజాబ్ జట్టులో ప్రభ్సిమ్రాన్ సింగ్, మార్కస్ స్టొయినిస్, యజువేంద్ర చాహల్ వంటి స్టార్ ప్లేయర్లు విజయం కోసం పోరాడుతున్నారు. ఈ మ్యాచ్ రెండు జట్లకు టోర్నీలో ముందడుగు వేయడానికి అత్యంత కీలకంగా మారింది.
