తెలుగు చలనచిత్ర పరిశ్రమలో 1990వ దశకంలో వరుస విజయాలతో సంచలనం సృష్టించిన ప్రముఖ దర్శకుడు ఎస్వీ కృష్ణారెడ్డి, అక్కినేని నాగార్జున కాంబినేషన్లో ఒక భారీ జానపద చిత్రం రూపుదిద్దుకోవాల్సి ఉంది. 1995 కాలంలో కెరీర్ పరంగా ఇద్దరూ ఫుల్ ఫామ్లో ఉన్న సమయంలో ఈ క్రేజీ ప్రాజెక్ట్ను పట్టాలెక్కించేందుకు ప్లాన్ చేశారు. ఇండస్ట్రీలో స్టార్ హీరోల పెద్ద సినిమాలే కేవలం రూ. 2 నుంచి 3 కోట్ల బడ్జెట్తో పూర్తయిపోయే ఆ రోజుల్లో, ఈ చిత్రం కోసం ఏకంగా రూ. 6 కోట్ల భారీ బడ్జెట్ను అనుకోవడం అప్పట్లో ఒక పెద్ద సంచలనంగా మారింది.
ఈ ప్రతిష్టాత్మక చిత్రానికి ‘రాకుమారుడు’ అనే ఆకర్షణీయమైన టైటిల్ను ఖరారు చేసి, ప్రముఖ నిర్మాత నరసారెడ్డి నిర్మాణ బాధ్యతలు చేపట్టడానికి ముందుకు వచ్చారు. సినిమాపై భారీ అంచనాలు పెంచేలా నాగార్జున గెటప్కు సంబంధించిన కొన్ని ప్రత్యేకమైన స్టిల్స్ను కూడా అప్పట్లో విడుదల చేయగా, అవి మార్కెట్లో విపరీతమైన క్రేజ్ తెచ్చిపెట్టాయి. నాగార్జున సైతం ఈ జానపద కథపై ఉన్న నమ్మకంతో ఏకంగా 60 రోజుల బల్క్ కాల్ షీట్లను కేటాయించారు. అయితే, చివరి నిమిషంలో అంత పెద్ద మొత్తాన్ని ఒంటరిగా భరించడం తన వల్ల కాదని నిర్మాత నరసారెడ్డి వెనక్కి తగ్గడంతో ఈ డ్రీమ్ ప్రాజెక్ట్ అనూహ్యంగా ఆగిపోయింది.
ప్రాజెక్ట్ను కాపాడుకోవడానికి ప్రముఖ నిర్మాత అచ్చిరెడ్డిని భాగస్వామిగా తెచ్చేందుకు చేసిన ప్రయత్నాలు ఫలించలేదు. బడ్జెట్ తగ్గించి సినిమా చేద్దామనే ప్రతిపాదన రాగా.. నాగార్జున ఎంతో ప్రాక్టికల్గా స్పందిస్తూ, రిస్క్ వద్దని కథను పక్కన పెట్టమని సలహా ఇచ్చారు. ఆ తర్వాత నాగార్జున ఇచ్చిన భరోసాతో మలయాళ సూపర్ హిట్ ‘స్పటికం’ రీమేక్ హక్కులు సాధించి, వీరిద్దరి కాంబోలో ‘వజ్రం’ అనే కమర్షియల్ యాక్షన్ సినిమా ప్రేక్షకుల ముందుకు వచ్చింది. అయితే, ఎన్నో ఆశలు రేపిన ‘రాకుమారుడు’ అటకెక్కగా, ప్రత్యామ్నాయంగా వచ్చిన ‘వజ్రం’ చిత్రం బాక్సాఫీస్ వద్ద డిజాస్టర్ ఫలితాన్ని అందుకోవడం గమనార్హం.
